சமோலி: உத்தரகாண்ட் மாநிலம், ஜோஷிமத் நகரில் கடந்த 6ஆம் தேதி ஏற்பட்ட நிலச்சரிவு மற்றும் வெடிப்பால், பல்வேறு வீடுகள் மற்றும் கட்டடங்களில் விரிசல் ஏற்பட்டது. சில இடங்களில் கட்டடங்கள் இடிந்து விழுந்தன. ஆபத்தான நிலையில் இருக்கும் கட்டடங்களை அகற்றும் பணிகள் முன்னெடுக்கப்பட்டன. சிதிலமடைந்த இரு விடுதிகள் இடித்து அகற்றப்பட்டன. ஏறத்தாழ 800க்கும் மேற்பட்ட வீடுகள் சேதமானதாக மாநில அரசு எடுத்த கணக்கெடுப்பில் தெரிய வந்தது.
நில அதிர்வு காரணமாக ஜோஷிமத் நகரம் மண்ணுக்குள் புதைந்து வரும் அபாயம் இருப்பதாக அதிர்ச்சித் தகவல் வெளியாகின. ஆபத்தான இடங்களில் வசிக்கும் மக்கள் மீட்கப்பட்டு பாதுகாப்பான இடங்களுக்கு மாற்றப்பட்டனர். மேலும் பாதிக்கப்பட்டவர்களுக்கு பல்வேறு நிதி நிவாரணங்களை அரசு அறிவித்தது.
நில வெடிப்புக்குள்ளான ஜோசிமத் நகரில் தேசிய அனல் மின் கழகத்தின் விஷ்ணுகட் சுரங்கப்பாதை அமைக்கும் பணிகள் நடைபெற்று வருகின்றன. சுரங்கப்பாதை அமைக்கும் திட்டத்தால் ஜோசிமத் நகரில் நிலச்சரிவு மற்றும் நில வெடிப்புகள் உள்ளிட்ட பேரிடர்கள் உருவானதாக கூறப்படுகிறது.
இந்நிலையில், தேசிய அனல் மின் கழகத்தின் விஷ்ணுகட் திட்டத்தால் தான் நில வெடிப்பு ஏற்பட்டு, பல்வேறு வீடுகளில் விரிசல்கள் ஏற்பட்டதாகவும் இதன் காரணமாக திட்டத்தை மாநில அரசு கைவிட வேண்டும் என பொது மக்கள் போராட்டத்தில் ஈடுபட்டனர். ஜோஷிமத் நகர மக்கள் உள்பட பல்வேறு கிராமங்களைச் சேர்ந்த மக்கள் ஒன்று திரண்டு பேரணியில் ஈடுபட்டனர்.
தேசிய அனல் மின் கழகம் மற்றும் மாநில அரசுக்கு எதிராக கோஷங்கள் எழுப்பியும், பதாகைகளை ஏந்தியும் கிராம மக்கள் ஊர்வலமாக சென்றனர். மேலும் மாநில விஷ்ணுகட் திட்டத்தை கைவிட்டு நகரத்தை மீட்கும் பணியில் ஈடுபட வேண்டுமென பொது மக்கள் கோரிக்கை விடுத்தனர்.
நில வெடிப்புச் சம்பவம் அரங்கேறி 23 நாட்களைக் கடந்த நிலையில், பேரிடரால் பாதிப்புக்குள்ளான மக்களை இடம் மாற்றம் செய்தல், மறுவாழ்வு, உருக்குலைந்த நகரத்தை சீரமைக்கும் பணிகளை மேற்கொள்ளாமல் மாநில அரசு காலம் தாழ்த்தி வருவதாக கிராம மக்கள் அரசுக்கு எதிராக கோஷம் எழுப்பினர்.
இதையம் படிங்க: களத்தில் மல்யுத்த வீரர் உயிரிழப்பு.. கொலையா..?
