ஆப்கானிஸ்தானில் நிலவும் சூழல் குறித்து அனைத்துக் கட்சித் தலைவர்களிடம் வெளியுறவுத் துறை அமைச்சர் ஜெய்சங்கர் எடுத்துரைக்கவுள்ளார். அங்கு தாலிபான் ஆட்சியை கைப்பற்றிய நிலையில், இதன் காரணமாக பிராந்திய அரசியலில் ஏற்பட்டுள்ள தாக்கம், இந்திய அரசின் நிலைப்பாடு உள்ளிட்டவை குறித்து இந்தக் கூட்டத்தில் அனைத்துக் கட்சித் தலைவர்களுடன் விவாதிக்கவுள்ளார்.
மக்களவை எதிர்க்கட்சித் தலைவர் அதிர் ரஞ்சன் சௌத்ரி, மாநிலங்களவை எதிர்க்கட்சித் தலைவர் மல்லிகானர்ஜுன கார்கே உள்ளிட்டோர் இதில் பங்கேற்பார்கள் எனக் கூறப்படுகிறது.
இந்தியா இதுவரை 600க்கும் மேற்பட்டவர்களை ஆப்கனிலிருந்து மீட்டுள்ளது. இதில் 228 இந்திய குடிமக்களும் அடக்கம். அத்துடன் ஆப்கன் சீக்கியர்கள் 77 பேரை இந்தியா மீட்டுள்ளது.
மீதமுள்ள மக்களையும் பத்திரமாக மீட்பதே அரசின் பிரதான நோக்கம் என அனைத்துக்கட்சித் தலைவர் கூட்டத்தில் அமைச்சர் ஜெய்சங்கர் தெரிவித்துள்ளார். மேலும், ஆப்கன் மீட்பு நடவடிக்கையை எளிதாக்க, அவசர இ-விசா வழங்க இந்திய அரசு முடிவெடுத்துள்ளது என அவர் கூறியுள்ளார்.
ஆப்கானில் உள்ள 15 ஆயிரத்திற்கு மேற்பட்டோர் தங்களை மீட்க வேண்டும் என இந்திய அரசிடம் கோரிக்கை வைத்துள்ளதாக வெளியுறவுத் துறை அமைச்சகம் தெரிவித்துள்ளது.
இதையும் படிங்க: ’காபூல் விமான நிலையத்திற்கு செல்லாதீர்கள்’ - பிரிட்டன் எச்சரிக்கை
