ஹைதராபாத்: தொழில்நுட்ப யுகம் மின்னல் வேகத்தில் சென்று கொண்டிருக்கும் நிலையில், புதிய கண்டுபிடிப்புகள் ஒவ்வொரு நாளும் அறிமுகமாகின்றன. அந்த வகையில் கூகுளுக்கு சவால் விடும் வகையில் கடந்த 2022ம் ஆண்டு நவம்பர் மாதம் அமெரிக்காவின் ஓபன் ஏஐ(Open AI) நிறுவனம், சாட் ஜிபிடி (Chat GPT) என்ற தேடு பொறி செயலியை அறிமுகம் செய்தது. தொடக்கத்திலேயே நல்ல வரவேற்பை பெற்றதால், சாட் ஜிபிடி-யின் பயனாளர்களின் எண்ணிக்கை அதிகரித்தது. நாம் கேட்கும் கேள்விக்கு ஓரளவுக்கு துல்லியமான விடையை தருவது இந்த செயலியின் சிறப்பம்சம்.
இந்நிலையில் கர்நாடகா மாநிலம் பெங்களூவில் செயல்படும் Analytics India Magazine நிறுவனம், சாட் ஜிபிடி செயலியின் திறனை பரிசோதிக்க முடிவு செய்தது. அதன்படி, 2022ம் ஆண்டு நடைபெற்ற யுபிஎஸ்சி முதல் நிலைத்தேர்வின் 100 கேள்விகள் கேட்கப்பட்டன. புவியியல், பொருளாதாரம், வரலாறு, அறிவியல் மற்றும் நடப்பு நிகழ்வுகள் உள்ளிட்ட பல்வேறு பிரிவுகளில் வினாக்கள் கேட்கப்பட்டிருந்தன. ஆனால் மொத்தம் 100 கேள்விகளில், 54 கேள்விகளுக்கு மட்டுமே சாட் ஜிபிடி சரியான பதிலை அளித்தது.
அறிவியல், புவியியல், பொருளாதாரம் ஆகிய பிரிவுகளில் இருந்து கேட்கப்பட்ட கேள்விகளுக்கு தவறான விடைகளை அளித்தது. இதுகுறித்து கூறியுள்ள ஏஐஎம் நிறுவனம், "2021 செப்டம்பர் மாதம் வரையிலான தரவுகள் மட்டுமே சாட் ஜிபிடியிடம் உள்ளன. நடப்பு நிகழ்வுகள் குறித்த விவரம் அதனிடம் இல்லை. பொருளாதாரம், புவியியல் குறித்த கேள்விகளுக்கு, சரியான பதில் அளிக்கவில்லை" என தெரிவித்துள்ளது.
அமெரிக்காவின் மருத்துவத்தேர்வு, பலகட்ட எம்பிஏ தேர்வுகள், 3ம் பிரிவு பொறியாளர்களுக்கான கூகுள் கோடிங் நேர்காணல் ஆகியவற்றில் வெற்றி பெற்றுள்ள சாட் ஜிபிடியால், இந்தியாவில் கடினமாக கருதப்படும் யுபிஎஸ்சி தேர்வில் வெற்றி பெற முடியவில்லை. இதேபோல் சிங்கப்பூரில் நடத்தப்பட்ட பணியாளர்கள் தேர்விலும், சாட்ஜிபிடி தோல்வி அடைந்துள்ளதாக தகவல் வெளியாகி உள்ளது.
சாட்ஜிபிடி என்பது அடிப்படையில் ஒரு மெய்நிகர் ரோபோ (சாட்போட்). தகவலைத் தருவதில் கூகுளுக்கு இது பெரும் சவாலாக இருக்கும் என கணிக்கப்பட்டாலும், இது தரும் தகவல்கள் சில நேரங்களில் மிகவும் தவறாக இருக்கின்றன. பிற சாட் போட்களை போல, சாட் ஜிபிடி செயலியால் இணையத்தில் தேட முடியாது. தவறுகளை ஏற்றுக் கொள்ளவும், பொருத்தமற்ற கோரிக்கைகளை நிராகரிக்கவும் அதற்கு பயிற்சி தரப்பட்டுள்ளது.
செயற்கை நுண்ணறிவைப் பயன்படுத்தும் இந்த மெய்நிகர் ரோபோட், முழுவதும் உரையாடல் அடிப்படையிலானது. ஏராளமான தரவுகளை சேமித்து வைத்துக் கொள்ள முடியும். மாணவர்கள் தங்கள் கல்வி சார்ந்த பதில்களைக் கண்டறிய சாட்ஜிபிடியை பயன்படுத்தத் தொடங்கியதையடுத்து, நியூயார்க் கல்வி நிறுவனங்களில் அதன் பயன்பாட்டுக்கு தடை விதிக்கப்பட்டது குறிப்பிடத்தக்கது.
இதையும் படிங்க: கைலாசாவில் வாழ விருப்பமா..? ஆன்லைனில் விண்ணப்பிக்கலாம்.. நித்தியானந்தா அழைப்பு..
