புகைப்படக் கலைஞர் தானிஷ் சித்திக்கின் உடலை மீட்டுத்தருமாறு குடும்பத்தினர் கோரிக்கை

ஆஃப்கானிஸ்தானில் கொல்லப்பட்ட ராய்டர்ஸ் செய்தி நிறுவனத்தின் புகைப்படக் கலைஞர் தானிஷ் சித்திக்கின் உடலை மீட்டுத்தருமாறு அவரது குடும்பத்தினர் மத்திய வெளியுறவுத்துறை அமைச்சகத்திடம் கோரிக்கை விடுத்துள்ளனர்.

புலிட்சர் விருது பெற்றவரும், ராய்டர்ஸ் செய்தி நிறுவனத்தின் புகைப்படக் கலைஞருமான தானிஷ் சித்திக் (41) காந்தஹாரில் நடைபெற்ற தாலிபன் தாக்குதலில் நேற்று (ஜூலை.15) கொல்லப்பட்டார். அவரது மறைவுக்கு பல்வேறு அரசியல் கட்சித் தலைவர்களும் இரங்கல் தெரிவித்து வருகின்றனர்.

இந்நிலையில், தானிஷ் சித்திக்கின் குடும்பத்தினர் மறைந்த தங்களது மகனின் உடலை மீட்டு காந்தஹாரில் இருந்து டெல்லிக்கு கொண்டு வரக்கோரி வெளியுறவுத் துறை அமைச்சகத்திடம் வேண்டுகோள் விடுத்துள்ளனர். மேலும் தானிஷ் சித்திக்கின் உடலை தங்களது மூதாதையர்களின் கல்லறையில் அடக்கம் செய்ய விரும்புவதாகவும் அவரது தந்தை அக்தர் சித்திக் தெரிவித்துள்ளார்.

ஆப்கானிஸ்தானில் நிலவி வரும் போர் சூழலைப் பதிவு செய்து வந்த தானிஷ் சித்திக், காந்தஹாரின் ஸ்பின் போல்டக் மாவட்டத்தில் நடைபெற்ற தாலிபன் தாக்குதலில் கொல்லப்பட்டார்.

ரோஹிங்கியா இனப்படுகொலை நேரத்தில், மக்கள் புலம்பெயர்ந்ததை புகைப்படங்கள் வாயிலாக ஆவணப்படுத்தியதற்காக புலிட்சர் விருதை வென்றவர் தானிஷ் சித்திக்.

சமீபத்தில் கரோனா சூழலை தத்ரூபமாக பதிவு செய்யும் வகையில் வெளியான கரோனாவால் இறந்தவர்கள் எரிக்கப்படும் டெல்லியின் டாப் ஆங்கிள் புகைப்படம் தானிஷ் சித்திக்கால் எடுக்கப்பட்டது என்பது குறிப்பிடத்தக்கது.

இதையும் படிங்க: ஒளிப்படக் கலைஞர் தானிஷ் சித்திக் உயிரிழப்பு - முதலமைச்சர் ஸ்டாலின் இரங்கல்!