ஜெய்ப்பூர்: காங்கிரஸ் தலைவர் தேர்தல் அக்டோபர் 17ஆம் தேதி நடைபெறவுள்ளது. காங்கிரஸ் மூத்த தலைவர் சசி தரூர் மற்றும் ராஜஸ்தான் முதலமைச்சர் அசோக் கெலாட் ஆகியோர் இந்த பதவிக்கு போட்டியிடுகின்றனர். சோனியா காந்தியின் தீவிர ஆதரவாளரான அசோக் கெலாட் தலைவராக வாய்ப்புள்ளதாக கூறப்படுகிறது.
அவ்வாறு கெலாட் காங்கிரஸ் தலைவரானால், ராஜஸ்தானின் அடுத்த முதலமைச்சர் யார்..? என்ற பேச்சு எழுந்துள்ளது. கெலாட் முதலமைச்சர் பதவியை ராஜினாமா செய்தால், அனைத்து எம்எல்ஏக்களும் சச்சின் பைலட்டுக்கு ஆதரவு தெரிவிப்பார்கள் என்று ராஜஸ்தான் அமைச்சர் ஒருவர் அண்மையில் கூறியிருந்தார்.
இந்த நிலையில், இன்று சச்சின் பைலட்டின் வீட்டு வாசலில் திடீரென புல்டோசர் ஒன்று வந்து நின்றது. அந்த புல்டோசர் பைலட்டின் வீட்டுக்குள் நுழைய முயன்றதால் அங்கு சிறிது நேரம் பரபரப்பு நிலவியது. இதையடுத்து பைலட்டின் வீட்டில் இருந்தவர்கள் புல்டோசர் ஓட்டி வந்தவர்களிடம் விசாரித்ததில், ராஜ் பவன் செல்ல வேண்டிய புல்டோசர், சச்சின் பைலட் வீட்டுக்குள் தவறுதலாக வந்துவிட்டதாக தெரிந்தது. இதையடுத்து, புல்டோசர் பைலட் வீட்டிலிருந்து வெளியேறியது.
இதையும் படிங்க: காங்கிரஸ் கட்சியின் அடுத்த தலைவர் யார்..? தொடங்கிய வேட்புமனு தாக்கல்..!
