20 ஆயிரம் பிளாஸ்டிக் பாட்டில்களைக் கொண்டு உஜ்கோங்கரின் இந்த வீடு கட்டும் முறை, இந்தியாவின் பிளாஸ்டிக் கழிவுகளின் சிக்கலுக்கு ஒரு தீர்வாக அமையலாம். செங்கற்களையும் சிமென்ட்டுகளையும் கொண்டு வீடுகளைக் கட்டும் முறையை அனைவரும் பார்த்திருப்போம். ஆனால் பிளாஸ்டிக் பாட்டில்களைக் கொண்டு வீடு கட்டும் முறையை இந்தியாவிலேயே முதன்முறையாக இவர் முயன்றுள்ளார்.
இந்தப் புதுமையான வீட்டை சாண்ட் காட்ஜ் பாபா பகுதியிலுள்ள அமராவதி பல்கலைக்கழகத்திற்கு அருகே இவர் கட்டியுள்ளார். இந்தியாவின் வளர்ந்துவரும் பிளாஸ்டிக் கழிவுகளை நிர்வகிக்க, இந்த முறை ஒரு தீர்வாக இருக்கலாம் என்பதே உஜ்கோங்கரின் கருத்து.
சட்ட மேற்படிப்பை முடித்துள்ள உஜ்கோங்கர், தனது கனவினை அடைய விரும்பியே இந்தக் கட்டுமான துறையில் அடியெடுத்துவைத்தார். கட்டுமான துறையில் புதுமையான முயற்சிகளை முன்னெடுப்பதில் இவருக்குத் தீராத வேட்கை இருந்தது.
தனது இந்த புதிய யோசனை குறித்து நிதின் உஜ்கோங்கர் கூறுகையில், "ஒரு நாள் காலையில் நான் நடந்து சென்றுகொண்டிருந்தபோது சாலையில் கொட்டப்பட்டிருந்த பிளாஸ்டிக் கழிவுகளைப் பார்த்தபோதுதான், அதிலிருந்து வீடு கட்டும் சிந்தனை எனக்குள் எழுந்தது.
இது குறித்து இணையத்தில் தேடியபோதுதான், இந்தோனேசியா, தென் ஆப்ரிக்கா ஆகிய நாடுகளில் ஏற்கனவே இது போன்ற பிளாஸ்டிக் வீடுகள் கட்டப்பட்டது தெரியவந்தது. இதன்பிறகே சுற்றுச்சூழலுக்கு ஆபத்து விளைவிக்கும் பிளாஸ்டிக் கழிவுகளிலிருந்து வீடுகளைக் கட்ட நான் முடிவு செய்தேன்
என்னுடைய இந்த யோசனையை கட்டுமான தொழிலில் ஈடுபட்டிருந்தவர்களுடன் பகிர்ந்துகொண்டபோது, அவர்கள் முதலில் இதை ஏற்க மறுத்தனர், ஆனால் கொஞ்சம் கொஞ்சமாக இதன்மீது அவர்களுக்கு நம்பிக்கை ஏற்பட்டது" என்று பெருமையுடன் கூறுகிறார் நிதின் உஜ்கோங்கர்.
சாதாரண முறையில் கட்டப்படும் வீடுகளைக் காட்டிலும் பிளாஸ்டிக் கழிவுகளைக் கொண்டு கட்டப்படும் வீடுகளுக்கு 30 முதல் 40 விழுக்காடு வரை குறைவாகவே செலவாவதாகவும் இதன்மூலம் பிளாஸ்டிக் ஒழிப்பு பரப்புரையில் தனது சிந்தனை முக்கியப் பங்காற்றும் என்றும் அவர் கூறினார்.
இதையும் படிங்க: பட்டையைக் கிளப்பும் பிளாஸ்டிக் டீ சர்ட்டுகள்!
