நவீன யுகத்தில் காகிதத்தில் எழுதுவதற்கு பதிலாக மொபைல், லேப்டாப் என ஹைடெக் சாதனங்களுக்கு பெரும்பாலானோர் மாறிவிட்டனர். இந்தக் காலத்தில் ஆம்பிடெக்ஸ்ட்ரஸ் (Ambidextrous) எனப்படும் இரண்டு கைகளையும் பயன்படுத்தும் முறையில் எழுதி கர்நாடக இளைஞர் ஒருவர் காண்போரை வியப்பில் ஆழ்த்துகிறார்.
கர்நாடக மாநிலம், ரைச்சூரில் உள்ள குத்தேபல்லூரைச் சேர்ந்த இளைஞர் பசவ்ராஜ், ஆம்பிடெக்ஸ்ட்ரஸ் எனும் முறையில் வித்தியாசமான பாணியில் முயன்று சாதனைப் படைத்துள்ளார். இவர் தனது இரு கைகளாலும் ஒரே நேரத்தில் எழுதுவது மட்டுமின்றி, எழுத்துக்களை தலைகீழாக எழுதுகிறார்.
கர்நாடகா-தெலங்கானா எல்லையில் வசிக்கும் பசவ்ராஜ், சக்திநகரில் அமைந்துள்ள ஆர்டிபிஎஸில் பணிபுரிகிறார். இவருக்கு சிறு வயது முதலே புதுமையாக ஏதேனும் செய்ய வேண்டும் என்ற ஆசை இருந்து வந்துள்ளது. இதற்காக பல முறை யோசித்துக் கொண்டிருந்த நேரத்தில் தான், ஆம்புலன்ஸ்களில் ஆங்கில (ECNALUBMA) எழுத்துகள் தலைகீழாக எழுதப்படுவதை பசவ் கவனித்துள்ளார். ஒரே நேரத்தில் இரண்டு கைகளால், அதுவும் தலைகீழாக எழுதினால் நிச்சயம் அது தனித்துவமாகத்தானே இருக்கும் என்ற எண்ணம் பசவ்ராஜுக்குள் துளிர்விட்டது.
முதல்முதலாக 2011ஆம் ஆண்டு பசவ்ராஜ் இந்த முயற்சியைத் தொடங்கினார். தன் முயற்சியிலிருந்து சற்றும் விலகாத விக்கிரமாத்தித்தனாக பசவ்ராஜ் விடாமல் பயிற்சி எடுத்துக் கொண்டார். அந்த நாள் வந்தது, தனது இருகைகளாலும் வேகமாக, தலைகீழாக எழுதும் அளவிற்கு பசவ் பயிற்சி பெற்றார்.
ஆரம்பத்தில் தனது தாய்மொழியான தெலுங்கில் பயிற்சி எடுத்தவர், நாளடைவில் கன்னடம், ஆங்கிலம், இந்தியிலும் எழுதக் கற்றுக் கொண்டார். இப்போதெல்லாம் பசவ், தனது இருகைகளாலும் ஒரே நேரத்தில் நான்கு மொழிகளை வேகமாக எழுதும் அளவிற்கு ஜித்தாக மாறிவிட்டார்.
அவரது இந்த முயற்சியின் பலனாக இந்தியா புக் ஆஃப் ரெக்காட், தி ஆசியன் புக் ஆஃப் ரெக்காட் ஆகிய இரண்டு புத்தகங்களிலும் இடம்பெற்று சாதனையும் படைத்துள்ளார். வருங்காலத்தில் கின்னஸ் புத்தகத்தில் இடம்பெறுவதே பசவ்ராஜின் இலக்கு. நிச்சயம் அவரது கடும் உழைப்பு கின்னஸ் சாதனைப் படைக்க அவருக்கு உதவும் என்பதில் மாற்றுக்கருத்தில்லை.
இதையும் படிங்க:நோபிள் வேர்ல்டு ரெக்கார்டில் இடம் பிடித்த மாணவன் - எதற்கு தெரியுமா?
