மத்திய அரசால் காஷ்மீரில் மேற்கொள்ளப்படும் வளர்ச்சித் திட்டங்கள் குறித்து மக்களுக்கு தெரிவிக்கும் வகையில் அமைச்சர்கள் அங்கு பயணம் மேற்கொள்ள வேண்டும் என டெல்லியில் நடைபெற்ற அமைச்சரவைக் குழுக் கூட்டத்தில் மோடி தெரிவித்ததாக தகவல் வெளியானது. இதையடுத்து, கத்ரா, பந்தல் ஆகிய பகுதிகளில் மத்திய ஜவுளித்துறை அமைச்சர் ஸ்மிருதி இரானி இன்று சுற்றுப்பயணம் மேற்கொள்ளவுள்ளார்.
இதேபோல், மத்திய ரயில்வே துறை அமைச்சர் பியூஷ் கோயல் ஸ்ரீநகருக்கு செல்லவுள்ளார். ஜம்மு காஷ்மீரில் உள்ள 60 இடங்களுக்கு 38 மத்திய அமைச்சர்கள் செல்ல திட்டமிட்டுள்ளதாக அம்மாநில தலைமைச் செயலாளர் சுப்பிரமணியம் தெரிவித்துள்ளார். நகர்ப் பகுதிகளுக்கு மட்டுமல்லாமல் கிராமப் பகுதிகளுக்கும் அவர்கள் பயணம் மேற்கொள்ளவுள்ளதாக தகவல் வெளியாகியுள்ளது. ஜனவரி 18ஆம் தொடங்கி ஜனவரி 24ஆம் தேதி வரை இப்பயணம் தொடரும் எனவும் தெரிவிக்கப்பட்டுள்ளது.
