உலகில் பணக்கார கடவுள் என்றழைக்கப்படும் திருப்பதி திருமலை ஏழுமலையான் கோயில் தேவஸ்தானத்தில் ஜூன் 8, 9 ஆம் தேதிகளில் பணியாளர்களும், ஜூன் 10 ஆம் தேதி உள்ளூர் மக்களும் தரிசனத்துக்கு அனுமதிக்கப்படவுள்ளனர். இதைத்தொடர்ந்து, மற்ற பகுதியினர் அனைவரும் ஜூன் 11ஆம் தேதி முதல் தரிசனத்துக்கு அனுமதிக்கப்படுகிறார்கள்.
கரோனா தொற்று பரவாமல் இருக்க பக்தர்களின் கூட்டம் அதிகமாவதைத் தடுப்பதற்கும், தனிப்பட்ட இடைவெளியைக் கடைப்பிடிப்பதற்கு பல்வேறு கட்டுப்பாடுகள் விதிக்கப்பட்டுள்ளன. இதுதொடர்பாக திருப்பதி திருமலை தேவஸ்தான அறக்கட்டளையின் தலைவர் ஓய்.வி. சுப்பா ரெட்டி கூறியதாவது, "ஒவ்வொரு நாளும் 60 முதல் 70 ஆயிரம் வரையிலான பக்தர்கள் திருமலையில் வழக்கமாக தரிசனம் மேற்கொண்டு வந்த நிலையில், தற்போது 6 முதல் 7 ஆயிரம் பக்தர்கள் வரை அனுமதிக்கப்படவுள்ளனர். ஒரு மணி நேரத்தில், 500 பக்தர்கள் சாமி தரிசனம் மேற்கொள்ளலாம். காலை 6.30 மணி முதல் மாலை 7.30 மணி வரை தரிசனம் நடைபெறும்.
65 வயதுக்கு மேற்பட்டவர்கள், 10 வயதுக்கு உட்பட்டவர்கள் கண்டிப்பாக அனுமதி இல்லை. அதேபோல் நோய் கட்டுப்பாடு பகுதியிலிருந்து வருபவர்களும் அனுமதிக்கப்படமாட்டர்கள்" என்றார்.
இதைத்தொடர்ந்து, திருப்பதி திருமலை தேவஸ்தான நிர்வாக அதிகாரி ஏ.கே. சிங்கால் கூறியதாவது, "நாளொன்றுக்கு 3 ஆயிரம் டிக்கெட்டுகள் ஆன்லைனில் விற்கப்படும். அந்த டிக்கெட்டுகளை பெறுபவர்கள் கீழ் திருப்பதியிலுள்ள அலிபிரியில் வைத்து சோதனை மேற்கொள்ளப்பட்ட பின்னர் அனுமதிக்கப்படுவர்.
ஜூன் மாதத்துக்கான மொத்த ஆன்லைன் டிக்கெட்டுகளும், ஜூன் 8ஆம் தேதி விற்பனை செய்யப்படும். மேலும், 3 ஆயிரம் தரிசன டிக்கெட்டுகள் அலிபிரி சோதனை சாவடியில் தினமும் விற்கப்படும். கோயிலுக்குத் தரிசனத்துக்கு வரும் ஒவ்வொரு பக்தர்களுக்கும் வெப்ப பரிசோதனை மேற்கொள்ளப்படும்.
