வேளாண் துறை சார்ந்து மத்திய அரசு அண்மையில் இயற்றிய மூன்று சட்டங்களை எதிர்த்து காங்கிரஸ் உள்ளிட்ட எதிர்க்கட்சிகள் நாடு முழுவதும் போரட்டங்களை நடத்திவருகின்றன. இதை கருப்புச் சட்டம் என குறிப்பிட்டுள்ள காங்கிரஸ் தலைவர் சோனியா காந்தி, இந்தச் சட்டத்தை நிறைவேற்றவிடமால் தடுக்க காங்கிரஸ் ஆளும் மாநிலங்களுக்கு அறிவுறுத்தியுள்ளார்.
இந்நிலையில் வேளாண் துறையை மையமாகக் கொண்டு இயங்கும் மாநிலங்களான பஞ்சாப், ஹரியானாவில் இந்தப் போராட்டத்தை காங்கிரஸ் தீவிரப்படுத்திவருகிறது. இதன் முக்கிய அம்சமாக, கிசான் யாத்ரா என்ற பெயரில் நாடு தழுவிய பேரணி ஒன்றை நடத்த காங்கிரஸ் திட்டமிட்டுள்ளது.
முன்னதாக, காந்தி பிறந்த நாளான அக்டோபர் இரண்டாம் தேதி இந்தப் பேரணி தொடங்க இருந்ததாகவும், தற்போது மூன்றாம் தேதிக்கு மாற்றப்பட்டுள்ளதாகவும் காங்கிரஸ் வட்டாரங்கள் கூறுகின்றன. இந்தப் பேரணியை பஞ்சாப் மாநிலம் சங்க்ரூரிலிருந்து ராகுல் காந்தி தொடங்கி வைக்கவுள்ளதாக அக்கட்சி வட்டாரங்கள் தெரிவிக்கின்றன.
