டீக்கடையில் அமர்ந்து முதலமைச்சர் பரப்புரை!

புதுச்சேரி: காமராஜ் நகர் தொகுதியில் தேர்தல் பரப்புரையில் ஈடுபட்ட முதலமைச்சர் நாராயணசாமி டீக்கடையில் அமர்ந்து மக்களிடம் பரப்புரை செய்த காட்சி பலரையும் வியப்பில் ஆழ்த்தியுள்ளது.

புதுச்சேரி மாநிலம் காமராஜ் நகர் சட்டப்பேரவைத் தொகுதியின் இடைத்தேர்தல் அக்டோபர் 21ஆம் தேதி நடைபெறுகிறது. இந்த இடைத்தேர்தலில் காங்கிரஸ், என்.ஆர் காங்கிரஸ் உள்ளிட்ட 9 கட்சி வேட்பாளர்கள் போட்டியிடுகின்றனர். இதனால், காமராஜ் நகர் தொகுதியில் அரசியல் கட்சிகளின் தேர்தல் பரப்புரை தீவிரமடைந்து வருகிறது.

இந்நிலையில், காங்கிரஸ் வேட்பாளர் ஜான் குமார், காமராஜ் நகர் தொகுதிக்குட்பட்ட கிருஷ்ணா நகர், எழில் நகர் உள்ளிட்ட பகுதிகளில் தீவிர வாக்கு சேகரிப்பில் ஈடுபட்டார். இதனைத்தொடர்ந்து வாக்கு சேகரிப்பில் ஈடுபட்ட புதுச்சேரி மாநில முதலமைச்சர் நாராயணசாமி அப்பகுதியில் உள்ள டீக்கடையில் அமர்ந்து தேநீர் பருகி தேர்தல் பரப்புரை செய்தார்.

அவருடன், மாநில காங்கிரஸ் தலைவர் நமச்சிவாயம், நாடாளுமன்ற உறுப்பினர் வைத்திலிங்கம், அகில இந்திய காங்கிரஸ் செயலாளர் சஞ்சய் தத், அரசு கொறடா அனந்தராமன், சட்டமன்ற உறுப்பினர் ஜெயமூர்த்தி, திமுக வடக்கு மாநில அமைப்பாளர் சிவக்குமார், இந்திய கம்யூனிஸ்ட் கட்சியின் நிர்வாகி நாரா கலைனாதன் உள்ளிட்ட பலர் இருந்தனர்.

தேர்தல் பரப்புரையின்போது செய்தியாளர்களிடம் பேசிய முதலமைச்சர் நாராயணசாமி, 'இந்தத் தேர்தலோடு என்.ஆர்.காங்கிரஸ், அதிமுக, பாஜக ஆகிய கட்சிகள் கானாமல் போய்விடும். கடந்த இடைத்தேர்தலில் அனைத்து தமிழ்நாடு அதிமுக அமைச்சர்கள் இங்கு வந்து முகாமிட்டும் வெற்றி பெறமுடியவில்லை.

வேலை வாய்ப்பு வழங்குவதை வலியுறுத்திதான் இந்தத் தேர்தலை எதிர்கொள்கிறோம். கூடிய விரைவில் திமுக தலைவர் ஸ்டாலின், ராஜாஸ்தான் முதலமைச்சர் அசோக் கெலாட் உள்ளிட்ட தலைவர்கள் தேர்தல் பரப்புரைக்காக வரவுள்ளனர்' என்று தெரிவித்தார்.