பிரபல மலையாள நடிகை காரில் கடத்தப்பட்டு 2017ஆம் ஆண்டு பாலியல் ரீதியாக துன்புறுத்தல் செய்யப்பட்டார். இந்த விவகாரம் பெரும் பரபரப்பை ஏற்படுத்திய நிலையில், இதுதொடர்பாக முக்கிய குற்றவாளியான பல்சர் சுனில் உள்ளிட்ட சிலரை கேரள காவல் துறை கைது செய்தது. இந்த வழக்கு விசாரணையில் இதன் பின்னணியில் பிரபல மலையாள நடிகர் திலீப் மூளையாக செயல்பட்டதாகக்கூறி அவரை காவல் துறையினர் கைது செய்து சிறையில் அடைத்தனர். தொடர்ந்து ஜாமினில் அவர் விடுவிக்கப்பட்டார்.
இந்த வழக்கில், தான் குற்றமற்றவன் என்பதை நிரூபிக்க, நடிகை கடத்தலின் போது எடுக்கப்பட்டதாகக் கூறப்படும் வீடியோ மற்றும் அதனை எடுக்க பயன்படுத்திய ஃபோனையும் தங்கள் வசம் ஒப்படைக்க வேண்டும் என திலீப் கேரள உயர் நீதிமன்றத்தை நாடினார். இதனை ஏற்க மறுத்த நீதிமன்றம், திலீப்பின் கோரிக்கையை நிராகரித்தது.
திலீப் உச்ச நீதிமன்றத்தில் மேல்முறையீடு செய்திருந்தார். வீடியோ உள்ளிட்ட ஆதாரங்களைக் கோரியிருந்த திலீப்பின் கோரிக்கையை உச்ச நீதிமன்றமும் நிராகரித்தது. இதனைத் தொடர்ந்து, எர்ணாகுளம் கூடுதல் நீதிமன்றத்தில் வழக்கின் விசாரணை இன்று நடைபெற்றது. விசாரணையில் பங்கேற்காத நடிகர் திலீப்பை நீதிமன்றம் கடுமையாகச் சாடியது. பின்னர், டிசம்பர் 3ஆம் தேதி வழக்கின் விசாரணையை ஒத்திவைத்து நீதிமன்றம் உத்தரவிட்டது. வழக்கின் விசாரணையை திலீப் உள்நோக்கத்துடன் தொய்வுப்படுத்துகிறார் என பல்வேறு தரப்பினர் குற்றச்சாட்டு எழுப்புவருகின்றனர்.
இதையும் படிங்க: நம்பிக்கை வாக்கெடுப்பில் உத்தவ் தாக்கரே வெற்றி!
