பெங்களூருவில் உள்ள இஸ்ரோ கட்டுப்பாட்டு அறையில், இன்று காலை 8 மணிக்கு அனைத்து அறிவியல் அறிஞர்கள் முன்னிலையில் பிரதமர் உரையாற்றினார். அதன் தொகுப்பு...
- 'பாரத் மாதா கி ஜே' என்று கூறி உரையைத் தொடங்கிய நரேந்திர மோடி, இஸ்ரோ அறிவியல் அறிஞர்கள் மனம்தளர வேண்டாம்; இது ஒன்றும் சாதாரண சாதனை அல்ல, இந்தியாவே உங்களை நினைத்து பெருமைப்படுகிறது.
- சந்திரயான்-2 திட்டத்திற்கு இங்கு இருக்கும் அனைத்து அறிவியல் அறிஞர்களும் பல நாட்களாக தூக்கம் மறந்து, நாட்டின் கனவை நிறைவேற்ற அயராது உழைத்துவந்தீர்கள். தற்போது உங்கள் முகங்களில் இருக்கும் கவலையை என்னால் புரிந்துகொள்ள முடிகிறது. அதைக் கலைக்கத்தான் நான் இங்கு வந்தேன்.
- இது நமக்கு பின்னடைவு கிடையாது, நாடு உங்கள் மீது முழு நம்பிக்கை வைத்துள்ளது. எதிர்காலத்தில் இன்னும் நாம் தொடர வேண்டிய வெற்றிகள் பல உள்ளன. மேலும் யாரும் தொடமுடியாத இடத்தை நாம் தொட முயற்சித்தோம் அதுவே மிகப்பெரிய வெற்றியாகும்.
- உங்களைப் போல் இந்திய மக்கள் விக்ரம் லேண்டர் நிலவில் தரையிறங்குவதை காண மிக ஆர்வமாக இருந்தனர், ஆனால் இப்போது ஒட்டுமொத்த இந்தியர்களும் உங்கள் துயரத்தில் பங்குகொண்டு உங்களுடன் நிற்கிறோம்.
- சந்திரயான் திட்டத்திற்கு உழைத்ததின் மூலம், நிலவை தொடுவதற்கு நம் தன்னம்பிக்கை பல மடங்கு அதிகரித்துள்ளது.
- நீங்கள் அதீத திறமை வாய்ந்தவர்கள். இந்திய வெற்றிக்கு உங்கள் பங்கு அளவற்றது, மேலும் சந்திரயான் திட்டத்தால்தான் உலக நாடுகளுக்கு நிலவின் தென்துருவத்தில் தண்ணீர் இருப்பது தெரியவந்துள்ளது.
- நம் வரலாற்றை திரும்பி பார்த்தோமென்றால், இதுபோன்ற கடினமான சூழ்நிலைகளை நாம் பல கடந்து வந்துள்ளோம், அப்போதெல்லாம் நாம் ஒரு நாளும் தைரியத்தை கைவிட்டதில்லை அதேபோன்று இப்போதும் நாம் இருக்க வேண்டும்.
