இந்திய அணியின் முன்னாள் நட்சத்திர வீரர் கெளதம் காம்பீர், பாஜக சார்பில் கிழக்கு டெல்லி நாடாளுமன்றத் தொகுதியில் போட்டியிட்டு வெற்றி பெற்றார். எம்.பி., ஆக தேர்ந்தெடுக்கப்பட்ட போதும் கிரிக்கெட் வர்ணனை உள்ளிட்ட வேலைகளில் பிஸியாக இருப்பதால், காம்பீரைத் தொகுதியில் பார்க்க முடிவதில்லை என்ற விமர்சனம் பரவலாகவே உள்ளது.
இந்நிலையில், டெல்லியின் ஐ.டி.ஓ. பகுதியில் கெளதம் காம்பீரைக் காணவில்லை என்று போஸ்டர்கள் ஒட்டப்பட்டுள்ளதால் பெரும் பரபரப்பு ஏற்பட்டுள்ளது. 'இவர் கடைசியாக இந்தூரில் நண்பர்களுடன் ஜிலேபி தின்று கொண்டிருந்தார். இவரைப் பற்றிய தகவல்கள் கிடைத்தால் உடனடியாக தெரிவிக்கவும்' என்றும் அதில் குறிப்பிடப்பட்டுள்ளது.
