ஆந்திர மாநிலம் விஜயவாடாவில் உள்ள அரசு விடுதி ஒன்றில் தேசாரி ஆதித்யா (8) என்ற சிறுவன் தங்கி படித்து வந்துள்ளார். நேற்று விடுதி கழிப்பறைக்குச் சென்ற தேசாரி ஆதித்யா வெகுநேரமாகியும் திரும்பி வரவில்லை. இதனால் அவரது நண்பர்கள் விடுதி முழுவதும் தேடினர்.
இந்நிலையில், கழுத்தில் வெட்டுக் காயத்துடன் கழிவறையில் ரத்த வெள்ளத்தில் தேசாரி ஆதித்யா சடலமாக கிடந்துள்ளார். சிறுநீர் கழிக்கச் சென்ற சக மாணவர்கள், தேசாரி ஆதித்யாவின் உடலைக் கண்டு கூச்சலிட்டனர். இதனையடுத்து விடுதி காப்பாளர், காவல்துறையினருக்கு தகவல் தெரிவிக்கப்பட்டது.
சம்பவ இடத்திற்கு விரைந்து வந்த காவல்துறையினர், தேசாரி ஆதித்யாவின் உடலைக் கைபற்றி உடற்கூறாய்வுக்காக அரசு மருத்துவமனைக்கு அனுப்பி வைத்து விசாரணை மேற்கொண்டு வருகின்றனர்.
இது குறித்து காவல்துறை அதிகாரி ஒருவர் கூறும்போது, ‘விடுதி கழிப்பறையில் பள்ளிச் சிறுவன் சடலமாக கிடந்தது மிகவும் அதிர்ச்சிக்குள்ளானது. கழுத்தில் வெட்டுக்காயம் இருப்பதால் கொலையாக இருக்கலாம் என்ற கோணத்தில் விசாரித்து வருகிறோம்’ என்றார்.
