2+2 அமைச்சர்கள் உரையாடல்: முக்கிய ஒப்பந்தங்கள் கையெழுத்து!

டெல்லி: அமெரிக்க-இந்திய வெளியுறவு, பாதுகாப்புத் துறை அமைச்சர்கள் இடையிலான 2+2 மூன்றாம் கட்ட இருதரப்பு உரையாடல் இன்று (அக்.27) நடைபெறுகிறது. அப்போது, இரு நாடுகளின் ஆயுதப் படைகளுக்கு இடையில் புவிசார் தகவல் பகிர்வை விரிவுபடுத்துவதற்கான ராணுவ ஒப்பந்தம் கையெழுத்தாகும் என்று எதிர்பார்க்கப்படுகிறது.

வெளியுறவுத் துறை அமைச்சர் எஸ்.ஜெய்சங்கர், பாதுகாப்புத் துறை ராஜ்நாத் சிங் ஆகியோருடன் 2+2 பேச்சுவார்த்தை நடத்துவதற்காக, அமெரிக்க வெளியுறவுத் துறை அமைச்சர் மைக்கேல் பாம்பியோ, அந்நாட்டின் பாதுகாப்புத் துறை அமைச்சர் மார்க் எஸ்பர் ஆகியோர் நேற்று(அக்.26) டெல்லி வந்தனர்.

நவம்பர் 3ஆம் தேதி அமெரிக்க அதிபர் தேர்தல் நடைபெறவுள்ள நிலையில், இந்தியா-அமெரிக்கா அமைச்சர்கள் இடையேயான சந்திப்பு முக்கியத்துவம் வாய்ந்ததாகப் பார்க்கப்படுகிறது. கிழக்கு லடாக்கிலுள்ள உண்மையான கட்டுப்பாட்டுக் கோட்டில் (எல்ஏசி) இந்தியாவுக்கும், சீனாவுக்கும் இடையே கடுமையான ராணுவ போக்கு நிலவிவரும் சூழலில், இச்சந்திப்பு நடைபெறுகிறது.

அதே நேரத்தில், சீனாவிற்கும், அமெரிக்காவிற்கும் இடையிலான பதட்டங்களும் அதிகரித்துள்ளன. அமெரிக்க அமைச்சர்கள் இருவரும் டெல்லியில் உள்ள போர் நினைவுச்சின்னத்தை பார்வையிட்டு, போரில் வீர மரணம் அடைந்து வீரர்களுக்கு மரியாதை அஞ்சலி செலுத்தவுள்ளனர். 2 + 2 அமைச்சர்கள் இடையிலான பேச்சுவார்த்தை இன்று காலை 10 மணிக்கு நடைபெறுகிறது.

பின்னர் அமைச்சர்கள் இருவரும் பிரதமர் நரேந்திர மோடியை அவரது இல்லத்தில் சந்தித்து பேச்சுவார்தை நடத்துகின்றனர். இதன் பின்னர், அமெரிக்க அமைச்சர்கள் இருவரும் இலங்கை, மாலத்தீவு மற்றும் இந்தோனேசியா ஆகிய நாடுகளுக்கு புறப்பட்டு செல்லவுள்ளனர். முன்னதாக, இந்திய பாதுகாப்பு அமைச்சகம் சார்பில் வெளியிட்டிருந்த செய்தி குறிப்பில், “இந்தியா-அமெரிக்கா இரு தரப்பினரும் புவி-இடஞ்சார்ந்த ஒத்துழைப்புக்கான அடிப்படை பரிமாற்றம் மற்றும் ஒத்துழைப்பு ஒப்பந்தத்தில் (BECA) கையெழுத்திடப்படும் என்று அறிவித்தது.

இது இருநாடுகளுக்கு இடையிலான புவிசார் ஒத்துழைப்பையும், ஏவுகணை அமைப்புகளின் துல்லியத்தை மேம்படுத்தவும் உதவியாக அமையும்”. என்று தெரிவிக்கப்பட்டுள்ளது.