தேசியவாத காங்கிரஸ் கட்சியின் அஜித் பவாருடன் இணைந்து மகாராஷ்டிரா முதலமைச்சராக தேவேந்திர ஃபட்னாவிஸ் பதவியேற்று கொண்டார். தனிப்பெரும்பான்மை இல்லாதபோதிலும் பாஜக ஆட்சி அமைத்தது ஜனநாயக விரோத செயல் என பல்வேறு தரப்பினர் விமர்சித்தனர். இதற்கு மத்திய முன்னாள் அமைச்சரும், பாஜகவின் மூத்தத் தலைவருமான ஆனந்த் குமார் ஹெக்டே பதிலடி தந்துள்ளார்.
இதுகுறித்து அவர், "பாஜகவைச் சேர்ந்த தேவேந்திர ஃபட்னாவிஸ் மகாராஷ்டிரா முதலமைச்சராக 80 மணி நேரங்கள் இருந்தார் என்பது அனைவருக்கும் தெரியும். பின்னர் அவர் ராஜினாமா செய்தார். ஏன் அவர் இந்த நாடகம் ஆட வேண்டும்? பெரும்பான்மை இல்லாதது எங்களுக்கு தெரியாதா? ஆனாலும் அவர் முதலமைச்சரானார். இந்த கேள்வியைதான் அனைவரும் கேட்கின்றனர்.
மத்திய அரசு அளித்த ரூ. 40,000 கோடி நிதியை பயன்படுத்துவதற்கான அதிகாரம் முதலமைச்சருக்கே உள்ளது. காங்கிரஸ்-சிவசேனா-தேசியவாத காங்கிரஸ் கூட்டணி ஆட்சி அமைத்திருந்தால் அந்த நிதி தவறாக பயன்படுத்தப்பட்டிருக்கும். எனவே, நாடகம் ஆட வேண்டும் என திட்டமிட்டோம். ஃபட்னாவிஸ் முதலமைச்சராக பதவியேற்ற 15 மணி நேரத்திற்குள் ரூ. 40,000 நிதியை மத்திய அரசிடம் திருப்பி சேர்த்துவிட்டோம்" என்றார்.
நவம்பர் 23ஆம் தேதி முதலமைச்சராக பதவியேற்றுகொண்ட ஃபட்னாவிஸ் நவம்பர் 26ஆம் தேதி ராஜினாமா செய்தார்.
இதையும் படிங்க: நாடாளுமன்றத்தை அதிரவைக்கும் ஹைதராபாத் கொலை வழக்கு!
