மத்திய அரசு பெட்ரோல் மற்றும் டீசலுக்கான கலால் வரியை லிட்டருக்கு மூன்று ரூபாய் உயர்த்தியிருக்கிறது. கடந்த 20ஆண்டுகளில் இல்லாத அளவிற்கு கச்சா எண்ணெய்யின் விலை வீழ்ச்சியடைந்துள்ளது. மக்கள் கொரோனா குறித்து கவலைப்பட்டு வரும் சூழ்நிலையில் மத்திய அரசு எடுத்திருக்கும் இந்த நடவடிக்கை மக்களுக்கு அநீதி இழைக்கும் செயல் என சிபிஎம் கட்சி கேரள மாநிலத்தின் செயலர் கொடியேரி பாலகிருஷ்ணன் தெரிவித்துள்ளார்.
மத்தியில் ஆளும் கட்சிக்கு மக்கள் குறித்து எந்த அக்கறையும் இல்லை என்று காட்டமாக விமர்சித்துள்ளார். பெட்ரோல் மற்றும் டீசல் விலையை உயர்த்திய மத்திய அரசுக்கு வலுவான கண்டனத்தைப் பதிவுசெய்த அவர், உயர்த்தப்பட்ட பெட்ரோல், டீசல் விலையை உடனடியாக ரத்து செய்யவேண்டும் எனவும் வலியுறுத்தினார்.
இந்த விலையேற்றம் குறித்து மத்திய அரசு நேற்று வெளியிட்டுள்ள அறிக்கையில், பெட்ரோல் மற்றும் டீசல் மீதான கலால் வரி லிட்டருக்கு மூன்று ரூபாய் உயர்த்தப்படுவதாகவும், சிறப்பு கலால் வரி பெட்ரோல் லிட்டருக்கு 2 ரூபாய் முதல் 8 ரூபாய் வரை உயர்த்தப்பட்டுள்ளதாகவும டீசல் மீதான சிறப்பு கலால் வரி லிட்டருக்கு நான்கு ரூபாய் உயர்த்தப்பட்டுள்ளதாகவும் தெரிவித்துள்ளது. மேலும், சாலை செஸ் வரி பெட்ரோல் மற்றும் டீசல் லிட்டருக்கு 1 ரூபாய் உயர்த்தப்பட்டுள்ளதாகவும் குறிப்பிடப்பட்டிருந்தது.
இதையும் படிங்க: ஜம்மு காஷ்மீரில் இருவருக்கு கொரானா பாதிப்பு!
