ஆசிரியர் தினத்தையொட்டி ஒவ்வொரு ஆண்டும் புதுச்சேரியின் நான்கு பிராந்தியங்களிலும் பல்வேறு நிலைகளில் பணிபுரியும் ஆசிரியர்களைப் பாராட்டும் வகையில் சிறந்த ஆசிரியர் விருதுகள் புதுச்சேரி அரசால் வழங்கப்படுகின்றன.
இவ்விருதுகள் மாணவர்கள் முன்னேற்றத்திற்கு ஆசிரியர் ஆற்றிய பணி, கற்பித்தலில் மேற்கொண்ட புதுமையான வழிமுறைகள், செய்முறைகள் உள்ளிட்டவற்றின் அடிப்படையில் தேர்ந்த ஆசிரியர்களால் அனுப்பப்பட்ட, விண்ணப்பங்கள் ஆராயப்பட்டு ஆசிரியர்களுக்கு விருதுகள் வழங்கப்படுகிறது.
அதன் அடிப்படையில் நல்லாசிரியர் விருதுக்கு 19 ஆசிரியர்கள் தேர்வு செய்யப்பட்டிருந்தனர். அவர்களுக்கு இன்று புதுச்சேரி தனியார் ஹோட்டலில் நடைபெற்ற ஆசிரியர் தினவிழாவில் முதலமைச்சர் நாராயணசாமி, அம்மாநில துணைநிலை ஆளுநர் கிரண்பேடி விருதுகளை வழங்கி கௌரவித்தனர்.
அதன் பின்னர் விழாவில் பேசிய நாராயணசாமி,' உயர்கல்வியில் இந்திய அளவில் 890க்கும் மேற்பட்ட பொறியியல் கல்லூரிகளில், புதுச்சேரி மாநில கல்லூரி 26-ஆவது இடத்தில் உள்ளது. மேலும் கல்வித்துறையில் புதுச்சேரி மாநிலம் சிறந்து விளங்குகிறது. கீழ்நிலை, மேல்நிலை பள்ளிகளாக இருந்தாலும் சரி, கல்லூரி அளவில் கல்வியிலும் புதுச்சேரி மாநிலத்தின் பங்கு மிகப்பெரியதாக உள்ளது' என்றார்.
'கல்விக்கு மத்திய அரசு நான்கு சதவீதம் நிதிமட்டும்தான் ஒதுக்கீடு செய்கிறது. ஆனால் புதுச்சேரி அரசு கல்விக்கு ஆறு சதவீதம் ஒதுக்கீடு செய்துள்ளோம். அதில் ஒவ்வொரு ஆண்டும் 20 கோடி நிதி, கல்விக்காக ஒதுக்கியுள்ளதாகவும் புதுச்சேரி முதலமைச்சர் நாராயணசாமி தெரிவித்தார்.
அதேபோல், தனியார் பள்ளிகள் மாணவர் சேர்க்கையை அதிகரித்து வருகிறது. அதைக் காட்டிலும் அரசுப் பள்ளிகளில் அதிக மாணவர்களை சேர்க்க ஆசிரியர்கள், அதிக கவனம் செலுத்த வேண்டும் என்றும் அவர் கேட்டுக்கொண்டார். விழாவில் பள்ளி ஆசிரியர்கள் தங்கள் குடும்பத்தினருடன் கலந்து கொண்டனர்
