பிகார் சட்டப்பேரவை தேர்தலை முதலமைச்சர் நிதிஷ் குமார் தலைமையிலான ஐக்கிய ஜனதா தளத்துடன், தேசிய ஜனநாயக கூட்டணி எதிர்கொள்கிறது.
நிதிஷ் குமார் தலைமையிலான கூட்டணியில் தேர்தலை எதிர்கொள்ள விருப்பம் இல்லை என்று தெரிவித்து, மத்திய அமைச்சர் ராம் விலாஸ் பாஸ்வானின் லோக் ஜனசக்தி கட்சி, தேசிய ஜனநாயக கூட்டணியிலிருந்து வெளியேறியது. இந்த முடிவு பாஜகவிற்கு பெறும் பின்னடைவை ஏற்படுத்தியுள்ளது.
பிகார் சட்டப்பேரவை தேர்தலில் பாஜக சார்பில் போட்டியிடும் வேட்பாளர்களை இறுதி செய்வதற்காக அக்கட்சியின் மத்திய தேர்தல் குழு ஞாயிற்றுக்கிழமை கூடியது. இக்கூட்டத்தில் பிரதமர் நரேந்திர மோடி, பாஜக தலைவர் ஜே பி நட்டா மற்றும் கட்சியின் உயர்மட்ட தலைவர்கள் கலந்துகொண்டனர்.
இதில், மாநிலத்தில் நிலவும் அரசியல் சூழல் குறித்து நீண்ட விவாதங்கள் நடைபெற்றன. இந்நிலையில், வரும் 28ஆம் தேதி நடைபெறும் முதல்கட்ட தேர்தலுக்கான வேட்பாளர் பட்டியலை பாஜக இன்று வெளியிடவுள்ளதாக தெரிகிறது.
பிகார் சட்டப்பேரவைத் தேர்தல் வாக்குப்பதிவு அக்டோபர் 28ஆம் தேதி தொடங்கி, நவம்பர் 3, 7 என மூன்று கட்டங்களாக நடைபெறுகிறது. இதற்கான வாக்கு எண்ணிக்கை 10ஆம் தேதி நடைபெறும் என்றும், அன்றே தேர்தல் முடிவுகள் அறிவிக்கப்படும் என்று தேர்தல் ஆணையம் அறிவித்துள்ளது.
பிகாரில் மொத்தம் உள்ள 243 சட்டப்பேரவை தொகுதிகளில், 71 தொகுதிகளுக்கு முதல்கட்டமாக வரும் 28ஆம் தேதி வாக்குப்பதிவு நடைபெறுகிறது. இதற்கான வேட்பு மனுத் தாக்கல் அக்டோபர் ஒன்று முதல் எட்டாம் தேதி வரை நடைபெறுகிறது.
இதையும் படிங்க: பிகார் தேர்தல் : சிறையிலிருந்தே வேட்பாளர் பட்டியலைத் தேர்வு செய்யும் லாலு
