அமித் ஷாவை பணிய வைத்த ஸ்டாலின்? உற்சாகத்தில் உடன்பிறப்புகள்!

அதுமட்டுமின்றி, அமித் ஷா விவகாரத்தில் ஸ்டாலினை அழைத்து ஆளுநர் பேசியதும், அதனையடுத்து அமித் ஷா விளக்கமளித்திருப்பதன் மூலமும் தேசிய அளவில் மு.க.ஸ்டாலினின் முக்கியத்துவம் வெளிப்பட ஆரம்பித்திருப்பதாக உடன்பிறப்புகள் கூறுகின்றனர்.

உலக அளவில் இந்தியாவை அடையாளப்படுத்த நாட்டில் உள்ள அனைவரும் ஒரே மொழியைப் பயன்படுத்த வேண்டும். அவ்வாறு அனைவரையும் ஒருங்கிணைக்கும் மொழியாக இந்தி உள்ளது என மத்திய உள்துறை அமைச்சர் அமித் ஷா இந்தி தினத்தன்று தனது ட்விட்டர் பக்கத்தில் பதிவிட்டிருந்தார்.

அவரது இந்த கருத்து மூலம், மத்திய அரசு இந்தி பேசாத மாநிலங்களில் இந்தியை திணிக்க முயல்வது பட்டவர்த்தனமாக தெரிகிறது என எதிர்க்கட்சியினர் உட்பட பலர் கருத்து தெரிவித்தனர். மேலும், ட்விட்டரில் #StopHindiImposition, #தமிழ்வாழ்க போன்ற ஹேஷ்டேக்குகள் உலகளவிலும், இந்திய அளவிலும் ட்ரெண்டாகின. அதுமட்டுமின்றி திமுக தரப்பில் செப்டம்பர் 20ஆம் தேதி கண்டன ஆர்ப்பாட்டம் நடைபெறும் எனவும் அக்கட்சியின் தலைவர் மு.க.ஸ்டாலின் அறிவித்திருந்தார்.

இந்த சூழலில், தமிழ்நாடு ஆளுநர் பன்வாரிலால் புரோஹித் திமுக தலைவர் ஸ்டாலினை அழைத்து அமித் ஷா கருத்து தவறாக புரிந்துகொள்ளப்பட்டது எனவும், இந்தித் திணிக்கப்படாது என்பதையும் மத்திய அரசின் பிரதிநிதியாக தான் உறுதியளிக்கிறேன் எனவும் தெரிவித்தார்.

இதனைத் தொடர்ந்து அமித் ஷா கருத்துக்கு எதிராக திமுக நடத்தவிருந்த ஆர்ப்பாட்டம் தற்காலிகமாக ஒத்தி வைக்கப்படுகிறது. திமுக எப்போதும் இந்தித் திணிப்புக்கு எதிராக குரல் கொடுக்கும் என ஸ்டாலின் கூறினார். இதற்கிடையே, உள்துறை அமைச்சர் அமித் ஷாவும் இந்தி குறித்த தன்னுடைய கருத்து தவறாக புரிந்துகொள்ளப்பட்டது எனவும், தானும் இந்தி பேசாத மாநிலத்திலிருந்துதான் வந்திருக்கிறேன் எனவும் விளக்கமளித்தார்.

இந்நிலையில், இந்தித் திணிப்புக்கு எதிராக திமுக போராட்டம் நடத்துவதற்கு முன்பே தமிழ்நாடு ஆளுநர் திமுக தலைவர் ஸ்டாலினை அழைத்து அமித் ஷா கூறிய கருத்து தவறாகப் புரிந்து கொள்ளப்பட்டது எனக் கூறியதும், அமித் ஷா விளக்கம் அளித்ததும் இந்தித் திணிப்புக்கு எதிராக போராட்டம் நடத்தாமல், தங்கள் கட்சியின் மூலம் தமிழ்நாட்டிற்கு கிடைத்த வெற்றியாக திமுக உடன்பிறப்புகள் கருதுகின்றனர்.

அதுமட்டுமின்றி, இந்த விவகாரத்தில் ஸ்டாலினை அழைத்து ஆளுநர் பேசியதும், அதனையடுத்து அமித் ஷா விளக்கமளித்திருப்பதன் மூலமும் தேசிய அளவில் மு.க.ஸ்டாலினின் முக்கியத்துவம் வெளிப்பட ஆரம்பித்திருப்பதாக திமுகவினர் கூறுகின்றனர்.

ஆனால், ஏற்கனவே பொருளாதார மந்த நிலை விவகாரத்தில் மத்திய அரசு மீது நாடு முழுவதும் அதிருப்தி அலை நிலவிவருகிறது. இந்த சூழலில் இந்தித் திணிப்புக்கு எதிராக ஏதேனும் போராட்டம் நடந்தால், அதன் மூலம் பாஜகவுக்கு மேலும் அவப்பெயர் வரக்கூடும். அதைத் தவிர்க்கவே அமித் ஷா விளக்கமளித்தாரே ஒழிய ஸ்டாலினுக்கு அஞ்சி இல்லை என பாஜகவினர் முணுமுணுக்கின்றனர்.

இதையும் படிங்க: