அமராவதி: ஆந்திர மாநிலத்தை சேர்ந்த பிடெக் படித்து வந்த மாணவி நல்லபு ரம்யா. இவரை குஞ்சலா சசிகிருஷ்ணா என்ற இளைஞர் காதலிப்பதாகக் கூறி சொந்தரவு செய்து வந்ததாக கூறப்படுகிறது. ஆனால் ரம்யாவுக்கு இதில் விருப்பமில்லை என்று தெரிகிறது. இருப்பினும் சசிகிருஷ்ணா ரம்யாவை பின்தொடர்ந்து தொந்தரவு செய்து வந்தாக கூறப்படுகிறது.
ரம்யா காதலை ஏற்க மறுத்த நிலையில், ஆத்திரமடைந்த சசிகிருஷ்ணா, கடந்த ஆண்டு ஆகஸ்ட் 15ஆம் தேதி, ரம்யாவை பின்தொடர்ந்து குண்டூரில் மக்கள் நடமாட்டம் அதிகம் உள்ள பகுதியில் ரம்யாவை கத்தியால் பலமுறை குத்தி தப்பிச் சென்றார். இதில் கழுத்தில் பலத்த காயமடைந்த ரம்யா சம்பவ இடத்திலேயே உயிரிழந்தார். இந்தச் சம்பவம் அரசியல் வட்டாரத்திலும், பொது மக்கள் மத்தியிலும் பெரும் பரபரப்பை ஏற்படுத்தியது.
திஷா சட்டத்தின் கீழ் நடவடிக்கை: ரம்யாவின் தந்தை அளித்த புகாரில் அடிப்படையில், காவல்துறையினர் தீவிர விசாரணை மேற்கொண்டு சம்பவம் நடந்த 10 மணி நேரத்தில் நர்சராவ்பேட்டை அருகே உள்ள மொலக்லுரு கிராமத்தில் சசிகிருஷ்ணாவை கைது செய்தனர். தடயவியல் நிபுணர் குழு இரண்டு நாட்களில் டிஎன்ஏ அறிக்கையை சமர்ப்பித்தனர்.
குற்றஞ்சாட்டப்பட்ட சசிகிருஷ்ணா மீது ஒரு வாரத்தில் குற்றப்பத்திரிகை தாக்கல் செய்யப்பட்டது. பெண்கள் மற்றும் குழந்தைகளை பாதுகாக்கவும், அவர்களுக்கு எதிராக குற்றம்புரிபவர்களுக்கு கடுமையான தண்டனை வழங்கும் ஆந்திர மாநில திஷா சட்டத்தின் கீழ் வழக்கு வேகமாக விசாரிக்கப்பட்டு, நான்கு மாதங்களில் முடிக்கப்பட்டது.
இந்த வழக்கில் 28 சாட்சிகளிடம் விசாரணை நடத்தப்பட்டு, குற்றம்புரிய பயன்படுத்தி கத்தி, செல்போன், வாகனம் உள்ளிட்ட ஆதாரங்களை நீதிமன்றம் சேகரித்தது. இந்தநிலையில், நேற்று(ஏப்ரல் 29) குண்டூர் மாவட்ட விரைவு விசாரணை சிறப்பு நீதிமன்றம் இவ்வழக்கில் தீர்ப்பு வழங்கியது. அதில், குஞ்சலா சசிகிருஷ்ணா குற்றவாளி எனக் அறிவிக்கப்பட்டு, மரண தண்டனை விதித்து தீர்ப்பளித்தது. இந்த சம்பவம் நடந்து 9 மாதங்களில் குற்றவாளிக்கு தண்டனை வழங்கி தீர்ப்பு வெளியாகி உள்ளது குறிப்பிடத்தக்கது.
ஜெகன் வரவேற்பு: தீர்ப்பு குறித்து ரம்யாவின் தந்தை கூறுகையில்," ரம்யாவுக்கு நேர்ந்த சோகம் யாருக்கும் நடக்கக்கூடாது. திஷா முயற்சியால் நியாயம் கிடைத்துள்ளது. பெண்கள், குழந்தைகளுக்கு எதிராக குற்றம்புரிபவர்கள் இப்படிதான் தண்டிக்கப்பட வேண்டும். அப்போதுதான் குற்றங்கள் குறையும். அரசுக்கும் காவல்துறைக்கும் நன்றி" எனத் தெரிவித்தார்.
நீதிமன்ற தீர்ப்பை வரவேற்ற ஆந்திர முதலமைச்சர் ஜெகன்மோகன், "ரம்யா கொலை வழக்கில் விரைவு நீதிமன்றம் வழங்கிய வரலாற்றுச் சிறப்புமிக்க தீர்ப்பை வரவேற்கிறேன். இந்த வழக்கின் விசாரணையை விரைந்து முடித்து, குற்றவாளிக்கு தண்டனை பெற்று தர கடுமையாக உழைத்த காவல்துறைக்கு வாழ்த்துகள்" என்று தெரிவித்துள்ளார். அதேபோல் ஆந்திர மகளிர் ஆணையத் தலைவி வசிரெட்டி பத்மா தீர்ப்பை வரவேற்று ட்விட்டர் பதிவிட்டுள்ளார்.
இதையும் படிங்க: ஆந்திராவில் பள்ளிக் குழந்தைகளிடம் பாலியல் சீண்டல் செய்த ஆசிரியர் கைது!
