காதல் படுத்தும் பாடு: ஒரே நேரத்தில் இரண்டு பெண்களை மணந்த இளைஞர்!

இரண்டு பெண்களை காதலித்த பழங்குடியின சமூகத்தை சேர்ந்த இளைஞர், ஒரே மேடையில் இருவரையும் திருமணம் செய்த சம்பவம் அரங்கேறியுள்ளது.

பத்ராத்ரி: விஜய் சேதுபதி நடிப்பில் வெளியான திரைப்படம் "காத்துவாக்குல ரெண்டு காதல்". இந்த படத்தில் விஜய் சேதுபதிக்கு நயன்தாரா, சமந்தா ஆகியோர் மீது காதல் ஏற்படும். இருவரிடமும் காதலை வெளிப்படுத்தும் விஜய் சேதுபதி, இருவரையும் திருமணம் செய்து கொள்ள விரும்புவதாக கூறுவார். ஆனால் கடைசியில், இரண்டு ஹீரோயின்களும் விஜய் சேதுபதியை புறக்கணிப்பது போல கதை அமைந்திருக்கும்.

ஆனால் பழங்குடியினத்தை சேர்ந்த இளைஞர் ஒருவர், இரண்டு பெண்களை காதலித்து ஒரே மேடையில் அவர்களை திருமணமும் செய்துள்ளார். தெலங்கானா மாநிலம் பத்ராத்ரி கொதகுடேம் மாவட்டத்தில் தான் இச்சம்பவம் அரங்கேறியிருக்கிறது. சர்லா மண்டல் கிராமத்தை சேர்ந்த முத்தாத்தையா - ராமலட்சுமி தம்பதியின் மகன் சத்திபாபு.

இவருக்கு தோஸ்லாபள்ளி கிராமத்தை சேர்ந்த ஸ்வப்னா குமாரியுடன் காதல் ஏற்பட்டுள்ளது. ஸ்வப்னாவிடம், சத்திபாபு தனது காதலை கூற அவரும் ஏற்றுக் கொண்டார். இருவரும் நெருங்கி பழகியதில், ஸ்வப்னா கர்ப்பமானார். இதைத் தொடர்ந்து அவருக்கு பெண் குழந்தை பிறந்தது. திருமணம் முடிக்காமல் இருவரும் ஒன்றாக வாழ்ந்து வந்த நிலையில், பிரியும் நிலை ஏற்பட்டது. குழந்தையுடன் ஸ்வப்னா தாய் வீட்டில் வசித்து வந்த நிலையில், சத்திபாபு சொந்த ஊருக்கு சென்று விட்டார்.

இதற்கிடையே, குர்ணாபள்ளி கிராமத்தை சேர்ந்த சுனிதாவுடன், சத்திபாபுவுக்கு காதல் ஏற்பட்டுள்ளது. இருவரும் திருமணம் செய்யாமல் ஒன்றாக வசித்து வந்த நிலையில், கர்ப்பமான சுனிதாவுக்கு ஆண் குழந்தை பிறந்தது. இந்த விவகாரத்தை அறிந்த ஸ்வப்னா கிராம பஞ்சாயத்திடம் முறையிட்டார்.

இந்நிலையில் மூன்று குடும்பத்தினரும் கலந்து ஆலோசித்து திருமணம் செய்து வைக்க முடிவு செய்தனர். இருவரையும் திருமணம் செய்து கொள்வதாகவும், குழந்தைகளை பராமரித்துக் கொள்வதாகவும் சத்திபாபு உறுதி அளித்ததால், ஸ்வப்னாவும், சுனிதாவும் சமரசம் அடைந்தனர்.

அந்த அடிப்படையில், இன்று (மார்ச் 9) திருமணம் நடைபெற்றது. ஒரே மேடையில் இரண்டு பெண்களையும் சத்திபாபு திருமணம் செய்து கொண்டார். இதில் ஏராளமானோர் கலந்து கொண்டு மணமக்களை வாழ்த்தினர். முன்னதாக திருமண அழைப்பிதழில் இரண்டு மணமகள்களின் பெயர்களும் குறிப்பிடப்பட்டிருந்தது. தற்போது இத்திருமணம் சமூக வலைதளங்களில் பேசு பொருளாகியுள்ளது.

பழங்குடியின சமூகத்தின் சில பிரிவுகளில், ஒரு நபர் இரண்டு பெண்களை திருமணம் செய்து கொள்வது தவறில்லை என்றும் கூறப்படுகிறது. தெலங்கானா மாநிலம் அடிலாபாத் பகுதியை சேர்ந்த இளைஞர், கடந்த 2021ம் ஆண்டு தனது அத்தை மகள்கள் இருவரையும் திருமணம் செய்து கொண்டார். அர்ஜூன் என்ற இளைஞர் உஷாராணி, சுரேகா ஆகியோரை காதலித்து வந்த நிலையில், கடந்த 4 ஆண்டுகளுக்கு முன் இருவரையும் திருமணம் செய்து கொண்டார் என்பது குறிப்பிடத்தக்கது.