குறுக்கே வந்த ஆடு.. கவிழ்ந்த கார்.. தஞ்சை அருகே இருவர் தந்தை, மகள் உயிரிழந்த சோகம்!

தஞ்சாவூர்: திருச்சியைச் சேர்ந்தவர் விக்னேஷ்வரன் (34). பழைய இரும்பு பொருட்களை வாங்கி விற்பனை செய்யும் வியாபாரம் செய்து வருகிறார். இந்நிலையில், இவர் தனது மனைவி காயத்ரி (29), மகள் யாழினி (8) உடன் திருச்சியில் இருந்து தஞ்சைக்கு நேற்று (அக்.24) காலை வியாபார நோக்கமாகச் சென்றுள்ளார்.

பின்னர், வீட்டிற்கு திரும்பும்போது புதுக்குடி அருகே சாலையின் குறுக்கே திடீரென ஆடு வந்ததால், ஆடு மீது மோதாமல் இருக்க காரினை திருப்பி உள்ளார். அப்போது கட்டுப்பாட்டை இழந்த கார், சாலையில் கவிழ்ந்து விபத்துக்குள்ளானது.

இதில், மூன்று பேரும் படுகாயமடைந்தனர். இதனைப் பார்த்த அருகில் இருந்தவர்கள் விபத்தில் சிக்கியவர்களை மீட்டு ஆம்புலன்ஸ் மூலம் திருச்சி அரசு மருத்துவமனைக்கு சிகிச்சைக்காக அனுப்பி வைத்தனர். அதில் விக்னேஷ்வரன், யாழினி இருவரும் மருத்துவமனைக்குச் செல்லும் வழியில் உயிரிழந்தனர். படுகாயமடைந்த காயத்ரி அரசு மருத்துவமனையில் சிகிச்சை பெற்று வருகிறார். இதுகுறித்து செங்கிப்பட்டி காவல் நிலைய போலீசார் வழக்குப்பதிவு செய்து விசாரித்து வருகின்றனர்.