தூத்துக்குடி: தூத்துக்குடி மாவட்டம், இனிகோ நகர் பகுதியைச் சேர்தவர்கள் ஜேசுராஜ் (42), பிராங்பட்டு (28) மற்றும் ராஜுவ் (40). இவர்கள் மூவரும் கடந்த ஆகஸ்ட் 11ஆம் தேதி நாட்டுப்படகில் சுமார் 2 டன் எடை கொண்ட பீடி இலை பண்டல்களை கடத்திச் சென்றுள்ளனர்.
அப்போது, இலங்கை கல்பிட்டி கடல் பகுதியில் ரோந்துப் பணியில் இருந்த இலங்கை கடற்படையினர், கடத்தலில் ஈடுபட முயன்ற மூவரை கைது செய்தனர். பின்னர், அவர்கள் வந்த நாடுப்படகு மற்றும் பீடி இலை பண்டல்களை பறிமுதல் செய்த இலங்கை கடற்படையினர், கைது செய்யப்பட்ட மூவரையும் கல்பிட்டி கடற்படை முகாமிற்கு அழைத்துச் சென்றனர்.
பின்னர், பறிமுதல் செய்யப்பட்ட பண்டல்களை சுங்கத்துறை அலுவலகத்தில் ஒப்படைத்தனர். தொடர்ந்து, கைது செய்யப்பட்டவர்கள் மீது கடத்தல் வழக்குப் பதிவு செய்து விசாரணை நடத்தி வருகின்றனர்.
