47 ஆண்டுகளுக்குப் பின் ஆசிரியர்களை ஒன்றிணைத்து பாராட்டு விழா.. தேனியில் நெகிழ்ச்சி! - Theni Teacher students reunion

தேனி: தேனியில் நூறு ஆண்டுகளுக்கு மேலாக செயல்பட்டு வரும் அரசு உதவி பெறும் பள்ளியில், 1970 முதல் 1977ஆம் ஆண்டு வரை பயின்ற முன்னாள் மாணவர்கள், தற்போது அரசு அலுவலர்கள், தொழிலதிபர்கள் என பல்வேறு முன்னணி துறைகளில் இருந்து வருகின்றனர். இந்நிலையில், அவர்கள் அனைவரும் வாட்ஸ் அப் குழு மூலம் ஒன்றிணைத்து, மாணவர்கள் சந்திப்பு நிகழ்ச்சியை கடந்த மாதத்தில் அவர்கள் பயின்ற பள்ளியில் நடத்தி உள்ளனர். 

அதனைத் தொடர்ந்து, பள்ளியில் பயின்ற காலத்தில் தங்களுக்கு வகுப்பு எடுத்த ஆசிரியர்களைச் சந்தித்து, அவர்களுக்கு பாராட்டு விழா நடத்த வேண்டும் எனும் எண்ணத்தில் விழா ஏற்பாடு செய்தனர். அந்த வகையில், இன்று தேனியில் உள்ள தனியார் தங்கும் விடுதியில் இந்த நிகழ்ச்சி நடைபெற்றது. தங்கள் பள்ளி முன்னாள் ஆசிரியர்களை வரவழைத்து அவர்களுக்கு மரியாதை செய்து, 47 ஆண்டுகளுக்கு முன் தனக்கு சொல்லிக் கொடுத்த பள்ளி ஆசிரியரிடம், மாணவர்கள் தங்களை நினைவுபடுத்திக் கொண்டனர். 

அப்போது நிகழ்ச்சியில் பேசிய ஆசிரியர்கள், இது போன்று தனது மாணவர்கள் பல்வேறு துறைகளில் முன்னணியில் இருப்பது மகிழ்ச்சி அளிப்பதாகவும், தன்னுடன் பணியாற்றிய ஆசிரியரை நீண்ட வருடங்களுக்குப் பின்பு மீண்டும் சந்திக்கும் நிகழ்வை ஏற்படுத்திக் கொடுத்த மாணவர்களுக்கு நன்றி எனவும் நெகிழ்ச்சியுடன் மாணவர்கள் மத்தியில் பேசினர்.