அன்றாடம் நீங்கள் பயன்படுத்தும் Emoji-களின் உண்மை அர்த்தம் இதுவா! - 'படவார்த்தை'களின் பொருள் என்ன தெரியுமா? - WORLD EMOJI DAY 2024

Meaning of Emojis: என்ன மனநிலையில் இருக்கிறோம் என்பதை, வார்த்தைகளால் சொல்ல முடியாத போது, டக் டக் என ஒரு எமோஜியை அனுப்பி உரையாடலை நடத்துபவரா நீங்கள்?.. அப்படி நீங்கள் அனுப்பும் எமோஜியின் உண்மையான அர்த்தங்கள் தெரியுமா? ... தெரிந்து கொள்ளுங்கள் இந்த செய்தித்தொகுப்பில்!

சென்னை: இயந்திரங்கள் போல சுற்றிக் கொண்டிருக்கும் இன்றைய நவீன மனிதர்களின் வாழ்வில், உணர்ச்சிகளின் வெளிப்பாடாக மாறியிருக்கும் எமோஜிகளுக்கான நாள் தான் இன்று. 2014ம் ஆண்டு எமோஜிபீடியாவின் நிறுவனர் ஜெர்மி பர்ஜ்-ஆல் தொடங்கப்பட்டு ஒவ்வொரு வருடமும் ஜூலை 17ம் தேதி உலக எமோஜி தினமாகக் கொண்டாடப்பட்டு வருகிறது (WORLD EMOJI DAY).

மகிழ்ச்சி, கோபம், சோகம், காதல் என நமது உணர்ச்சிகளை மற்றவர்களுக்கு எப்படி புரியவைப்பது என வார்த்தைகளை தேடும் போது, நீங்க கவலைப்படாதீங்க நான் இருக்கேன் என அதை மிக சுலபமாக மாற்றி விடுகிறது இந்த எமோஜிகள்.

எமோஜியின் ஹிஸ்டரி: ஜப்பானிய மொழிச் சொல்லான ‘எமோஜி’-க்கு ‘பட வார்த்தை’ என பொருளாம். ஆப்பிள் நிறுவனம் தனது முதல் ஐபோனை 2007ல் வெளியிட்டபோது, வாடிக்கையாளர்களை கவர்வதற்காக எமோஜி கீபோர்டை அறிமுகப்படுத்தியுள்ளது. பின்நாட்களில் இது பிரபலமடையவே உலகமெங்கும் இருக்கும் பல்வேறு மக்கள் எமோஜிகளை பயன்படுத்த தொடங்கியுள்ளனர்.

எமோஜி மீனிங்:

👋 கையசைத்தல் - ஒரு உரையாடலை தொடங்குவதற்கு அல்லது முடிப்பதற்கு பயன்படுகிறது.

🙏 கூப்பிய கைகள் - இரண்டு கைகளும் ஒன்றாக இணைக்கப்பட்டுள்ள இந்த எமோஜி, நன்றி அல்லது வணக்கம் போன்ற மரியாதையை குறிக்கிறது.

😂 கண்ணீர் சிந்தும் எமோஜி - கண்ணீருடன் வாய்விட்டு சிரிப்பதை குறிக்கிறது

😶 வாய் இல்லாத முகம் - சொல்வதற்கு வார்த்தைகள் இல்லை எனவும் குறிப்பாக, ஏமாற்றம் அல்லது சோகம் போன்ற எதிர்மறை உணர்ச்சிகளையும் வெளிப்படுத்துகிறது.

🤞 ஃக்ராஸ்டு ஃபிங்கர்ஸ்- அதிர்ஷ்டம் அல்லது சாதகமான முடிவுக்கான விருப்பத்தைக் காட்ட பயன்படுகிறது.

🤙 கால் மீ ஹேண்ட் - பலரும் இதை ஸ்வாக் என நினைத்து கொண்டிருப்போம், ஆனால் இதற்கு கால் பண்ணுங்க என்பதே அர்த்தம்.

😬 முகம் சுளிக்கும் எமோஜி - எதிர்மறையான அல்லது பதட்டமான உணர்ச்சிகளை வெளிப்படுத்த பயன்படுத்தலாம்

💦 வியர்வை துளிகள் - வியர்வை, கடினமாக உழைப்பதையோ அல்லது மனஅழுத்தத்தையோ வெளிகாட்டுகிறது.

🧿 ஈவில் ஐ - எதிர்மறையான ஆற்றல்களை அகற்றுவதற்கு பயன்படுகிறது.

🤤 எச்சில் வடியும் முகம் - ஒரு பொருள் அல்லது நபர் மீது ஆசையை வெளிகாட்டுவது.

வாட்ஸ்அப் முதல் இன்ஸ்டாகிராம் வரை, எக்ஸ் தளம் முதல் பேஸ்புக் வரை எல்லா இடங்களிலும் எமோஜிகள் பயன்படுத்தப்படுகின்றன. இன்னும் சொல்ல போனால், தலையணைகள், டி-ஷர்ட்கள், போர்வைகள், நகைகளில் கூட எமோஜிக்களின் ஆக்கிரமிப்பு வந்துவிட்டது. இப்படி, அன்றாடத்தில் நமது உணர்வுகளை வார்த்தைகளின்றி வெளிப்படுத்த உதவும் எமோஜிக்களை தினத்தை நாமும் பழகலாமே!