சென்னை: தென்மேற்கு வங்கக்கடலில் உருவான காற்றழுத்த தாழ்வு மண்டலம், மேற்கு வடமேற்கு நோக்கி நகர்ந்து வட தமிழ்நாடு, தெற்கு ஆந்திரா கரையை ஒட்டிய புதுச்சேரி மற்றும் நெல்லூர் இடையே நாளை காலை கரையை கடக்க வாய்ப்பு உள்ளது என வானிலை ஆய்வு மையம் தெரிவித்துள்ளது.
இதன் காரணமாக வட தமிழ்நாடு மாவட்டங்களில் நேற்று மிக கனமழையும், இன்று லேசானது முதல் மிதமான மழையும் பெய்து வருகிறது. வங்கக்கடலில் உருவான காற்றழுத்த தாழ்வு மண்டலம் குறித்து வானிலை தன்னார்வலர் ஸ்ரீகாந்த் ஈடிவி பாரத் தமிழ்நாடு ஊடகத்திடம் பேட்டி அளித்துள்ளார்.
அதில், "காற்றழுத்த தாழ்வு மண்டலம் மேற்கு வட மேற்கு திசையில் நகரும் என எதிர்பார்க்கப்பட்ட நிலையில் வடமேற்கு திசையில் நகர்ந்துள்ளது. காற்று பிரிதல் வட தமிழகம் மேல் இருக்கும் என எதிர்பார்க்கப்பட்ட நிலையில் தெற்கு ஆந்திரா பகுதிக்கு நகர்ந்துள்ளது.
அதனால் தெற்கு ஆந்திரப் பகுதிகளில் மழையின் தாக்கம் சற்று அதிகமாகவே இருக்கிறது. தமிழகத்துக்கு முழுவதுமாக மழை நீங்கவில்லை. தமிழகத்திற்கான மழை மிதமாகவும், சற்று கூடுதலாகவும் இருக்கும். காற்றழுத்த தாழ்வு மண்டலம் தெற்கு ஆந்திரப் பகுதியில் கரையைக் கடக்கும் வரை மழைக்கான சாத்தியக்கூறுகள் இருக்கும்.
இதையும் படிங்க : "சென்னையில் மழைநீர் தேங்காமல் இருப்பதுதான் வெள்ளை அறிக்கை" - இ.பி.எஸ்-க்கு பதிலளித்த உதயநிதி!
ஆனால், நேற்று பெய்த அதிதீவிர மழை இன்று இருக்காது. குறிப்பாக, சென்னை மற்றும் சென்னையை ஒட்டி இருக்கக்கூடிய திருவள்ளூர், காஞ்சிபுரம், செங்கல்பட்டு, ராணிப்பேட்டை ஆகிய மாவட்டங்களில் கன மழைக்கான வாய்ப்பு இருக்கிறது.
சில சமயங்களில் லேசான மழையாகவும், சில சமயங்களில் பலத்த மழைக்கான வாய்ப்புகளும் இருக்கிறது.
காற்றழுத்த தாழ்வு மண்டலமானது, சென்னைக்கு சற்று அருகே வரும்பொழுது கனமழை பெய்ய வாய்ப்பு இருக்கிறது. அடுத்த நான்கு நாட்களுக்கு சென்னையில் மழை இருக்கிறது. ஆனால், அது தீவிர மழையாக இருக்காது. மழை குறித்து பயப்படாமல் முன்னெச்சரிக்கை நடவடிக்கையுடன் இருக்க வேண்டும்" என தெரிவித்தார்.
ஈடிவி பாரத் தமிழ் வாட்ஸ்ஆப் சேனலில் இணைய இங்கே க்ளிக் செய்யவும்
