வேலூர்: வேலூர் மாவட்டம், காட்பாடி அடுத்த சேவூர் பகுதியில் 'கலைஞரின் கனவு இல்லம்' திட்டத்திற்கு இலவச வீட்டு மனை பட்டா வழங்கும் நிகழ்ச்சி இன்று (ஆக.20) நடைபெற்றது. இதில் நீர்வளத்துறை அமைச்சர் துரைமுருகன் கலந்துகொண்டு, 300 பயனாளிகளுக்கு வீடு கட்டித்தர ஆணை, வீட்டு மனை பட்டா மற்றும் அரசின் நலத்திட்ட உதவிகளை வழங்கினார்.
பின்னர் நிகழ்ச்சியில் பேசிய அமைச்சர், “கலைஞரின் கனவு இல்லத் திட்டத்தில் ஒரு வீடு கட்ட ரூபாய் மூன்றரை லட்சத்தை அரசு ஒதுக்குகிறது. இதற்கு சிலர் ரூ.10 ஆயிரம், 15 ஆயிரம் கொடு என கேட்பதாக தகவல் வருகிறது. யாருக்கும் ஒரு ரூபாய் கூட கொடுக்க வேண்டாம்.
அப்படி யாராவது லஞ்சம் கேட்டால், அவர்கள் குறித்து உள்ளாட்சி அமைப்பு பிரதிநிதிகள் அல்லது மாவட்ட ஆட்சியரிடம் தகவல் தெரிவிக்கவும் அல்லது எனக்கு போன் செய்யவும். லஞ்சம் கேட்டவர்கள் மீது கடுமையான நடவடிக்கை எடுக்கப்படும். அரசு கொடுக்கும் திட்டத்தில் இல்லாதவர்களிடம் பேரம் பேசி காசு வாங்குவதை விட பிச்சை எடுக்கலாம். யாருக்கும் நீங்கள் ஒரு ரூபாய் கூட தரக்கூடாது.
மகளிர் உரிமைத் தொகை வராதவர்கள் குறித்து பட்டியல் தயார் செய்து வருகிறோம். அவர்களுக்கெல்லாம் விரைவில் வரும். பொன்னை மேம்பாலம் வரும் 30ஆம் தேதி திறந்து வைக்கப்படும். சேர்காட்டில் கட்டப்பட்டுள்ள அரசு மருத்துவமனையும் அடுத்த மாதம் திறக்கப்படும்.
காட்பாடி தொகுதியில் இல்லாது என எதுவுமே கிடையாது. எனது தொகுதிக்கு நான் எதுவும் செய்யத் தயாராக இருக்கிறேன். ஆனால் எனக்கு கீழே உள்ள தலைவர், கவுன்சிலர் போன்றவர்களும் ஒத்துழைக்க வேண்டும். நான் மட்டும் யோகியனாக இருந்தால் போதாது. எதிர்கட்சியினரே இந்த ஆட்சியை பாராட்டுகிறார்கள்.
எனக்கு உண்ண உணவாக, மூச்சுக்காற்றாக, இரத்த ஓட்டமாக இருப்பது எனது தொண்டர்கள் தான். அவர்களிடம் நான் சில நேரம் கோபித்துக் கொள்வேன், அது என் உரிமை. எல்லாம் துரைமுருகன் பார்த்துக்கொள்வார் என மகிழ்ச்சியோடு போங்க நான் பார்த்துக் கொள்கிறேன்" என பேசினார்.
பின்னர் செய்தியாளர்களிடம் பேசியவரிடம், அத்திக்கடவு - அவிநாசி திட்டம் 90 சதவீதப் பணிகள் அதிமுக ஆட்சியில் நிறைவேற்றப்பட்டதாகவும், இதற்கு திமுக சொந்தம் கொண்டாடுவதாக எடப்பாடி பழனிசாமி கூறியுள்ளது குறித்த கேள்விக்கு, அத்திக்கடவு - அவிநாசி திட்டம் தொடர்பாக எடப்பாடி பழனிசாமி கருத்துக்கு நான் பதில் சொல்லவில்லை என்றார்.
கலைஞர் நாணயம்: மறைந்த முன்னாள் முதலமைச்சர் கருணாநிதியின் நூற்றாண்டு நிறைவு விழாவையொட்டி நாணயம் வெளியிட்டது தொடர்பாக எடப்பாடி பழனிசாமியின் கருத்துக்கு, “தொடர்ந்து இதே போல தான் எடப்பாடி பழனிசாமி விமர்சனம் செய்து வருகிறார். இது தவறான செயல். முன்னாள் முதலமைச்சர் எம்.ஜி.ஆர் மற்றும் அண்ணா ஆகியோருக்கும் நாணயங்கள் வெளியிடப்பட்டது.
பாஜக தலைவர் அண்ணாமலை, எடப்பாடி பழனிசாமி சொன்ன கருத்து தவறானது என்று கூறியுள்ளது குறித்த கேள்விக்கு, நாணயங்கள் வெளியிடுவது மறைந்த தலைவர்களுக்கு ஒரு மரியாதை செலுத்தக்கூடியதாகும். இதனை மாற்றுக் கட்சியினர் கூட பாராட்டி வருகின்றனர். தமிழகத்தில் ஒரு மாண்பு இருக்கிறது. மறைந்த தலைவர்களைப் பற்றி பேசமாட்டார்கள்.
எடப்பாடி பழனிசாமி காழ்ப்புணர்ச்சியின் காரணமாக இது போன்ற கருத்துக்களை கூறி வருகிறார். அவர் அப்படி பேசுவது தவறானது. நாணயம் வெளியீட்டு விழாவிற்கு ஏன் ராகுல் காந்திக்கு அழைப்பு விடுக்கவில்லை என்ற கேள்விக்கு, அதனை அரசிடம் தான் கேட்க வேண்டும்.
கீழ்பவானி: கீழ்பவானி அணையில் நீர்க்கசிவு இருப்பதாக கூறப்படுகிறது தொடர்பான கேள்விக்கு, கீழ் பவானி கால்வாய்களை சீர்படுத்துவதற்கு தமிழக அரசு ரூ.900 கோடி நிதி ஒதுக்கீடு செய்துள்ளது. ஆனால், அங்குள்ள விவசாயிகள் அதனை சரி செய்யக்கூடாது என தகராறு செய்து வருகிறார்கள். அவர்களின் பிரச்னை சிறிது சிறிதாக சரி செய்து, திட்டத்தை நடைமுறைப்படுத்த நடவடிக்கை எடுத்து வருகிறோம்.
காவேரி - குண்டாறு இணைப்புத் திட்டத்தில் மத்திய அரசு தொடர்ந்து பேச்சுவார்த்தையில் தான் ஈடுபட்டு வருகிறது. தென்பெண்ணை - பாலாறு இணைப்பு என்னுடைய நீண்ட நாள் கனவு. அந்த திட்டத்தை நிறைவேற்ற தொடர்ந்து முயற்சி செய்வேன். சமஸ்கிருத மொழி குறித்த கேள்விக்கு, அது டெட் லாங்குவேஜ். செத்துப்போன மொழி என தெரிவித்தார்.
ஈடிவி பாரத் தமிழ் வாட்ஸ்ஆப் சேனலில் இணைய இங்கே க்ளிக் செய்யவும்
இதையும் படிங்க : “சமஸ்கிருதத்தில் இருந்து தான் கலாச்சாரம் தோன்றியது” - ஆளுநர் ஆர்.என்.ரவி பேச்சு! - RN Ravi about Sanskrit
