அரியலூர்: சிதம்பரம் நாடாளுமன்றத் தொகுதியில் போட்டியிடும் விடுதலை சிறுத்தைகள் கட்சித் தலைவர் திருமாவளவனை ஆதரித்து, அரியலூர் பேருந்து நிலையம் அருகே மதிமுக சார்பில் நேற்று (ஞாயிற்றுக்கிழமை) நடைபெற்ற பொதுக்கூட்டத்தில், அக்கட்சியின் பொதுச் செயலாளர் வைகோ பிரச்சாரம் மேற்கொண்டார்.
அப்போது பேசிய அவர், "இந்த நாடாளுமன்றத் தேர்தல் தான், இந்தியா மற்றும் தமிழ்நாடு எந்த திசையில் செல்லும் என்பதை முடிவு செய்யும் தேர்தல். ஜனநாயகத்திற்கும், சர்வாதிகாரத்திற்கும் இடையேயான போர் தான் இத்தேர்தல். தமிழ்நாட்டில் குழந்தைகளுக்கு வட நாட்டுப் பெயர்களை சூட்டும் நிலையில், பல்லாயிரக்கணக்கான குழந்தைகளுக்கு தமிழில் பெயர் சூட்டியவர் தான், திருமாவளவன்.
பிரதமர் மோடி தனது பதவியின் மதிப்பறியாது, திராவிட இயக்கத்தை அழிப்பேன் என பேசி வருகிறார். இது திராவிட இயக்க பூமி. பல்வேறு தலைவர்களாலும், லட்சக்கணக்கான தொண்டர்களாலும் பாடுபட்டு வளர்த்த இயக்கம் என்பதை அவர் அறிய வேண்டும். மோடி தலைமையில் நாடு சர்வாதிகார ஆட்சியை நோக்கிச் செல்கிறது.
இந்த தேர்தலில் பாஜக வெற்றி பெற்றால், நாடாளுமன்ற முறையை மாற்றிவிட்டு, ஜனாதிபதி ஆட்சி முறையைக் கொண்டு வந்து, தான் ஜனாதிபதி ஆகலாம் என மோடி மனப்பால் குடித்துக்கொண்டு இருக்கிறார். திராவிட இயக்கம் உள்ளவரை அது நடக்காது. இன்று இந்தியாவிற்கே வழிகாட்டும் நிலையில் முதலமைச்சர் மு.க.ஸ்டாலின் ஆட்சி நடத்தி வருகிறார்.
மகளிருக்கு உரிமைத் தொகை, நகரப் பேருந்துகளில் இலவச பயணம் என மகளிருக்கான பல்வேறு திட்டங்களை தமிழ்நாடு முதலமைச்சர் செயல்படுத்தி வருகிறார். மேலும், பள்ளிக்கு வரும் குழந்தைகளின் பசியைப் போக்கும் வகையில், குழந்தைகளுக்காக காலை உணவுத் திட்டத்தை கொண்டு வந்தவர் தான் முதலமைச்சர். இத்திட்டத்தை மற்ற மாநிலங்கள் பின்பற்றுவதைத் தாண்டி, கனடா போன்ற பல நாடுகளும் பின்பற்றுகின்றன.
இதன் மூலம், உலகிற்கு வழிகாட்டும் தகுதியைப் பெற்றுள்ளார், முதலமைச்சர் ஸ்டாலின். மேலும், தாய்க்குலங்களை தலைமேல் வைத்துக் கொண்டாடுகிறார். அரியலூர் மாவட்டத்தில் தான் மொழிக்காக கீழப்பழுவூர் சின்னசாமி, நீட் தேர்வை எதிர்த்து மாணவி அனிதா ஆகியோர் தங்களது இன்னுயிரை ஈந்தனர். திருமாவளவன் இந்தியாவில் மதிக்கப்படும் தலைவராக உயர்ந்திருக்கிறார்.
எனவே, அவர் லட்சக்கணக்கான வாக்குகள் வித்தியாசத்தில் வெற்றி பெறுவார். அதோடு, அவர் திராவிட இயக்கத்தின் பக்கபலமாக இருப்பார். வென்றுவிட்டோம் என்று நினைத்தால், தோல்வி தான் அவர்களுக்கு மிஞ்சும். இந்தியில் எழுதி வைத்துக்கொண்டு பாரதியார் பற்றியும், திருக்குறளைப் பற்றியும் பேசி எங்களை ஏமாற்றலாம் என்று நினைக்கிறார், பிரதமர் மோடி.
சாவர்க்கர் பிறந்தநாளில், 5 மாடி ஹோட்டல் போல இருக்கும் புதிய நாடாளுமன்றக் கட்டடத்தை மோடி திறந்து வைத்தார். கோட்சேயின் கூட்டம் பகிரங்கமாக இன்று உலாவுகின்றனர். நமது மொழிக்கு மோடியின் வடிவில் ஆபத்து வருகிறது. ராகுல் காந்தி பிரதமர் வேட்பாளர் என மு.க.ஸ்டாலின் முன்மொழிந்தை நான் வழிமொழிகிறேன்.
தமிழ்நாடு இந்துத்துவ சக்திகளுக்கு மரண அடி கொடுக்கும். அதற்கு சிதம்பரம் தொகுதியில் நமது வேட்பாளர் திருமாவளவன் வெற்றி பெற வேண்டும். எனவே, அனைவரும் 'பானை' சின்னத்தில் வாக்களித்து அவரை வெற்றி பெறச் செய்யுங்கள்" என்றார். இந்த பொதுக்கூட்டத்தில் அரியலூர் மற்றும் ஜெயங்கொண்டம் சட்டமன்ற உறுப்பினர்கள், கூட்டணி கட்சி நிர்வாகிகள் மற்றும் தொண்டர்கள் என ஏராளமானோர் கலந்து கொண்டனர்.
இதையும் படிங்க: தண்ணீர் தேடி அலைந்த யானை.. பள்ளத்தில் விழுந்து உயிருக்கு போராட்டம்! - Elephant Fell Into Pit
