சென்னை: கடந்த பிப்ரவரி மாதம், 2024-2025ஆம் நிதி ஆண்டுக்கான நிதிநிலை அறிக்கையை தாக்கல் செய்த நிதியமைச்சர் தங்கம் தென்னரசு, நூற்றுக்கும் மேற்பட்ட பல்வேறு புதிய அறிவிப்புகளை வெளியிட்டார். அதில், “கடந்த காலங்களில் டிசம்பர் மாதம் பெய்த அதிக மழையின் காரணமாக சென்னை உள்ளிட்ட பல்வேறு மாவட்டங்கள் மழை வெள்ளத்தால் பாதிக்கப்பட்டது.
அதனைத் தொடர்ந்து, தமிழகத்திற்கான வானிலை முன்னெச்சரிக்காக வானிலை தொடர்பான முடிவுகளை துல்லியமாக தெரிந்து கொள்ள, விரைவான வானிலை முன்னறிவிப்புகளைப் பெற இந்திய வானிலை ஆராய்ச்சி நிறுவனத்துடன் ஒப்பந்தம் மேற்கொள்ளப்படும்.
இதன்படி, 1,400 புதிய தானியங்கி மழைமானிகளையும், 100 புதிய தானியங்கி வானிலை நிலையங்களை நிறுவ ரூ.32 கோடி நிதி ஒதுக்கீடு செய்யப்படுகிறது. வெள்ளம், நில அதிர்வு உள்ளிட்டவற்றைக் கண்காணித்து பேரிடர் அபாய அளவைக் குறைக்க தொழில்நுட்ப மையம் அமைக்கப்படும்” உள்ளிட்ட அறிவிப்புகளை வெளியிட்டார்.
குறிப்பாக, வானிலை முன்னறிவிப்பை வலுப்படுத்தும் விதமாக, ராமநாதபுரம் மற்றும் சேலம் மாவட்டம் ஏற்காடு ஆகிய 2 இடங்களில் இரண்டு சி-பேண்ட் டோப்ளர் ரேடார்கள் (Doppler Radar) ரூ.56 கோடி மதிப்பில் அமைக்கப்படும் என்றும் அறிவிக்கப்பட்டிருந்தது.
இந்த நிலையில், தற்போது ரூ.50 கோடியில் சி-பேண்ட் டோப்ளர் ரேடார்கள் கொள்முதல் செய்ய பேரிடர் மேலாண்மைத்துறை டெண்டர் கோரியுள்ளது. இந்த புதிய சி-பேண்ட் டோப்ளர் ரேடார்கள் நிறுவுவதன் மூலமாக, வானிலை நிகழ்வுகளை முன்கூட்டியே துல்லியமாக கணிக்கும் பணியில் மிக முக்கிய பங்கு வகிக்கும் என கூறப்பட்டுள்ளது.
இதையும் படிங்க: தயாராகுது ககன்யான்.. இஸ்ரோ விஞ்ஞானியின் பிரத்யேக பேட்டி!
