திருப்பத்தூர்: திருப்பத்தூர் மாவட்டத்தில் அடையாளம் தெரியாத மூன்று பேர், வீட்டில் நுழைந்து மூதாட்டியை கட்டையால் தாக்கிவிட்டு கழுத்தில் இருந்த இரண்டு சவரன் தங்க நகையை பறித்து சென்ற சம்பவம் பெரும் பரபரப்பை ஏற்படுத்தியுள்ளது.
திருப்பத்தூர் மாவட்டம் தோரணம்பதி அடுத்த தாதகுள்ளனூர் பகுதியைச் சேர்ந்தவர்கள் வீரமணி- விஜயலட்சுமி (64) தம்பதி. இவர்களுக்கு இரண்டு ஆண் பிள்ளைகள் உள்ளனர். இருவரும் தனித்தனியே வெளியூரில் வேலை செய்து வருகின்றனர்.
இந்நிலையில் இவர்கள் வீடு ஒன்றை புதிதாக கட்டி வருகின்றனர். அந்த வீட்டின் கட்டட வேலையை பார்க்க வீரமணி சென்றுள்ளார். அப்போது விஜயலட்சுமி வீட்டில் தனியாக இருத்துள்ளார். விஜயலட்சுமி சில மாதங்களுக்கு முன்பு வீட்டில் வளர்க்கக்கூடிய பறவைகளை விற்பனை செய்து வந்துள்ளார். ஆனால் தற்போது அந்த தொழிலை நிறுத்திவிட்டதாக கூறப்படுகிறது.
விஜயலட்சுமி தனியாக வீட்டில் இருந்ததை அறிந்த மூன்று பேர் கொண்ட குழுவினர் விஜயலட்சுமியின் வீட்டை தட்டி தங்களுக்கு பறவை வேண்டும் கதவை திறங்கள் என கேட்டுள்ளனர். அதற்கு விஜயலட்சுமி கதவை திறக்காமல் வீட்டிற்குள் இருந்தபடி தற்போது பறவையை நான் விற்பதில்லை என பதிலளித்துள்ளார்.
அதையும் மீறி அந்த அடையாளம் தெரியாத மூன்று நபர்கள் கதவைத் திறங்க உங்களிடம் முக்கியமான ஒன்று குறித்து பேச வேண்டும் என கூறியுள்ளனர். இதையடுத்து விஜயலட்சுமி கதவை திறந்துள்ளார். கதவு திறக்கப்பட்ட மறுகணமே அந்த மூன்று நபர்களும் விஜயலட்சுமியின் தலையில் தாக்கியுள்ளனர். பின் அவரின் கை மற்றும் கால்களை மொபைல் போன் சார்ஜர் ஒயரால் கட்டி, விஜயலட்சுமியின் கழுத்தில் இருந்த இரண்டு சவரன் தங்க நகையை பறித்துள்ளனர்.
இதையும் படிங்க:
இதைப் பார்த்த விஜயலட்சுமி தலையில் பலத்த காயத்துடன் அலறல் சத்தத்துடன் அருகில் இருப்பவர்களை கத்தி அழைத்துள்ளார். ஆனால் கண்ணிமைக்கும் நேரத்தில் அந்த மூன்று நபர்களும் அங்கிருந்து தப்பி சென்றுள்ளனர். அலறல் சத்தம் கேட்டு அங்கு ஓடி வந்த அக்கம்பக்கத்தினர் மயக்கமடைந்த விஜயலட்சுமியை மீட்டு திருப்பத்தூர் அரசு மருத்துவமனைக்கு சிகிச்சைக்காக அனுப்பி வைத்தனர்.
பின்னர் மேல் சிகிச்சைக்காக விஜயலட்சுமி அங்கிருந்து வேலூர் தனியார் மருத்துவமனைக்கு அனுப்பி வைக்கப்பட்டார். இதனை அறிந்த திருப்பத்தூர் கிராமிய போலீசார் மற்றும் திருப்பத்தூர் உட்கோட்ட துணை காவல் கண்காணிப்பாளர் ஜெகநாதன் சம்பவ இடத்திற்கு சென்று விசாரணை மேற்கொண்டு வருகின்றனர்.
ஈடிவி பாரத் வாட்ஸ்அப் சேனலில் இணைய இங்கே கிளிக் செய்யவும்
