சென்னை: நீலகிரி மாவட்ட காவல் துறை அலுவலகத்தில், இளநிலை உதவியாளராக பணியாற்றிய பெண்ணுக்கு பாலியல் தொல்லை அளித்ததாக, அலுவலகத்தில் கண்காணிப்பாளராக பணியாற்றிய மோகனகிருஷ்ணனுக்கு எதிராக விசாகா குழுவில் புகார் அளிக்கப்பட்டது.
இந்த புகாரின் அடிப்படையில் விசாரணை நடத்திய விசாகா குழு, மோகன கிருஷ்ணன் மீது ஒழுங்கு நடவடிக்கை எடுக்க வேண்டும் எனவும், துறை ரீதியான விசாரணை முடியும் வரை அவரை பணியிடை நீக்கம் செய்ய வேண்டும் எனவும், பணியிடை நீக்க உத்தரவை ரத்து செய்தால் அவரை நீலகிரி மாவட்டத்தை விட்டு வேறு மாவட்டத்தில் பணியமர்த்த வேண்டும் எனவும் பரிந்துரைத்தது.
இதை எதிர்த்து மோகனகிருஷ்ணன் தாக்கல் செய்த வழக்கை விசாரித்த நீதிபதி பரதசக்கரவர்த்தி, பணியிடத்தில் பெண்களுக்கு பாலியல் தொல்லை என்பது நெறி பிரண்ட செயல் மட்டுமல்லாமல், மறைமுகமான சமூக பிரச்னையாகவும் உள்ளது. பாலியல் தொல்லை, பணியிடத்தில் பெண்களுக்கான அதிகாரத்தை மட்டுப்படுத்துவதுடன், மனரீதியாகவும், உடல் ரீதியாகவும் பெண்களை பாதிக்கச் செய்கிறது எனவும், இதன் காரணமாக பெண்கள் வேலையில் இருந்து விலகவும் தள்ளுகிறது எனத் தெரிவித்துள்ளார்.
பணியிடங்களில் பாலியல் தொல்லையால் சம்பந்தப்பட்ட பெண்கள் மட்டும் பாதிக்கப்படுவதில்லை. அங்கு பணியாற்றும் ஒட்டுமொத்த பெண்கள் மத்தியிலும் தாக்கத்தை ஏற்படுத்தி, நிறுவனங்களின் பணி ஆற்றலை பாதிக்கச் செய்து, நாட்டின் பொருளாதாரத்திலும் தாக்கத்தை ஏற்படுத்துகிறது எனக் குறிப்பிட்டுள்ளார்.
இந்த வழக்கைப் பொறுத்தவரை, மோகனகிருஷ்ணன் தரப்பில் சாட்சிகளை குறுக்கு விசாரணை செய்ய அனுமதிக்கவில்லை எனக் கூறுவதால், இந்த விவகாரத்தை விசாகா குழு, குற்றம் சாட்டப்பட்டவருக்கு வாய்ப்பளித்து, மீண்டும் முறையாக விசாரித்து, 60 நாட்களில் அறிக்கை அளிக்க வேண்டும் எனவும், அறிக்கையின் அடிப்படையில், மோகனகிருஷ்ணனிடம் விளக்கம் கேட்டு, நான்கு வாரங்களில் தண்டனை குறித்த முடிவை எடுக்க வேண்டும் எனவும் அரசுக்கு உத்தரவிட்டார்.
