தூத்துக்குடி: ராவ் பகதூர் குரூஸ் பர்னாந்திஸாவின் 155ஆவது பிறந்த நாள் தூத்துக்குடியில் அரசு விழாவாக கொண்டாடப்படுகிறது. இதனை முன்னிட்டு தூத்துக்குடி தமிழ் சாலை ரோட்டில் உள்ள குரூஸ் பர்னாந்திஸ் திருவுருவ சிலைக்கு நாம் தமிழர் கட்சியின் ஒருங்கிணைப்பாளர் சீமான் மாலை அணிவித்து மரியாதை செலுத்தினார்.
அதன் பிறகு செய்தியாளர்களை சந்தித்த சீமான் கூறுகையில், “அரசு மருத்துவர்கள், செவிலியர்கள் கொரோனா நேரத்தில் தேவதை போல தெரிந்தவர்கள். அனைத்து மருத்துவர்களையும் குறை சொல்ல முடியாது. போதுமான மருத்துவர்கள் பணி நிரப்பப்படவில்லை. ஆகவே கூடுதல் பணி சுமை இது போன்று சம்பவங்களுக்கு வழிவகுக்கிறது. மருத்துவர்களை போல காவல்துறையிலும் பணி சுமை ஏற்படுகிறது. ஆகையால் இரண்டு பணிகளிலும் பாதுகாப்பு மிக முக்கியம்” என்றார்.
"போதைப்பொருட்கள் தமிழ்நாட்டில் எளிதாகக் கிடைக்கிறது. முக்கியமாக பள்ளி, கல்லூரி மாணவர்களுக்கு போதைப்பொருள்கள் மிக எளிதில் கிடைக்கிறது. இதனால் சிறு பிள்ளைகள் கூட கர்ப்பமாகின்றனர்; ஏன் இப்படி நடக்கிறது என்றே ஆசிரியர்கள் புரியாமல் நிற்கின்றனர். இதற்கு முக்கியக் காரணம் போதைப் பொருள் தான். இந்த நிலையில் மாநில அரசு மத்திய அரசுக்கு போதைப்பொருளை தடுக்க கடிதம் எழுதுவது வேடிக்கையாக உள்ளது”.
மேலும், நேற்று திருநெல்வேலியில் நாம் தமிழர் கட்சி கூட்டத்தில் ஏற்பட்ட பிரச்னை குறித்து செய்தியாளர்கள் கேட்ட கேள்விக்கு, “நேற்று நடந்தது சம்பவம் இல்லை. 2026ல் நடக்கப்போவது தான் சம்பவம்” என்றார். தமிழக மீனவர்களை இலங்கையில் கைது செய்யபடுவது குறித்த கேள்விக்கு? "இதற்கு நான் என்ன செய்ய முடியும். ஒரு முறை எனக்கு வாய்ப்பு கொடுங்கள். அந்த ஐந்தாண்டில் தமிழக மீனவரை இலங்கை கடற்கரையினர் கைது செய்தால் அப்போது என்னிடம் கேளுங்கள். கேரள மீனவர்கள் எல்லை தாண்டி போகின்றார்கள். அந்த மீனவர்கள் ஏன் சிறைபிடிக்கப்படுவதில்லை?."
இதையும் படிங்க: சங்கராபுரம் ஊராட்சி மன்ற தேர்தல்: தேவியின் வெற்றி செல்லாது; நீதிமன்றம் உத்தரவு!
நடிகை கஸ்தூரி சர்ச்சை பேச்சு குறித்த கேள்விக்கு? "பேசுபவர்களை எல்லாம் கைது செய்யப்படுவது எந்த விதத்தில் நியாயம். இதை விட நான் நிறைய பேசி இருக்கின்றேன், என்னை பலர் பேசியுள்ளனர். இது அவரது அரசியலாகும். இது அரசியல் பழிவாங்கலாக தான் நான் பார்க்கின்றேன்," என்றார்.
ஈடிவி பாரத் தமிழ் வாட்ஸ்ஆப் சேனலில் இணைய இங்கே கிளிக் செய்யவும்.
