சென்னை: சென்னையைச் சேர்ந்த தம்பதிக்கு மூன்று பிள்ளைகள் உள்ள நிலையில், அதில் 11 வயதான சிறுமி ஒருவர் தனது உறவினர் வீட்டிற்குச் சென்று தனக்கு கடுமையான வயிற்று வலி மற்றும் பிறப்புறுப்பில் வலி இருப்பதாகக் கூறியுள்ளார். மேலும், தனது உறவினர் தன்னிடம் தொடர்ந்து தவறாக நடந்து கொண்டதாகவும் தெரிவித்துள்ளார்.
இதனைக் கேட்டு அதிர்ச்சி அடைந்த அச்சிறுமியின் உறவினர், சிறுமியை மருத்துவமனைக்கு அழைத்துச் சென்றுள்ளார். அங்கு அவரை பரிசோதித்த மருத்துவர்கள், நீண்ட நாட்களாக சிறுமி பாலியில் சீண்டலுக்கு ஆளாக்கப்படுள்ளதாக தெரிவித்துள்ளனர். அதனைத் தொடர்ந்து, இச்சம்பவம் குறித்து வில்லிவாக்கம் காவல் நிலையத்தில் சிறுமியின் உறவினர் புகார் அளித்துள்ளனர்.
அப்புகாரின் அடிப்படையில், சிறுமியை அழைத்துச் சென்று விசாரணை மேற்கொண்டதில், 16 வயதே ஆன சிறுமியின் உறவினர் ஒருவர் சிறுமிக்கு பாலியல் சீண்டல் அளித்தது தெரிய வந்துள்ளது. அதேபோல், அப்பகுதியில் வசிக்கும் மற்றொரு 16 வயது சிறுவன் சிறுமியை மிரட்டி பாலியல் சீண்டல் அளித்ததும் தெரிய வந்துள்ளது.
மேலும், அப்பகுதியைச் சேர்ந்த மற்றொரு நபரும் சிறுமியிடம் தகாத முறையில் நடந்து கொண்டது தெரிய வந்துள்ளது. இதனிடையே, சிறுமிக்கு பாலியல் சீண்டல் அளித்த உறவினரின் நண்பர் என பலர் அச்சிறுமியிடம் தகாத முறையில் நடந்து கொண்டதும், சுமார் 6 மாதங்களாக பாலியல் சீண்டல்களுக்கு உள்ளாக்கப்பட்டு வேதனைகளை அனுபவித்து வந்துள்ளதும் விசாரணையில் தெரிய வந்துள்ளது.
மேலும், இது குறித்து தனது பெற்றோரிடம் தெரிவிக்க முயன்ற போது, அவர்கள் மதுபோதையில் அதனைக் கண்டுகொள்ளவில்லை எனவும், நேற்றும் தன்னிடம் தவறாக நடந்ததால் தன்னால் வலி தாங்க முடியாததை அடுத்து, தனது உறவினரைச் சந்தித்து தனக்கு நேர்ந்த கொடுமைகளைக் கூறியதாக வேதனையுடன் தெரிவித்துள்ளார்.
இதனையடுத்து, போக்சோ சட்டத்தின் கீழ் வழக்குப்பதிவு செய்த வில்லிவாக்கம் அனைத்து மகளிர் போலீசார், சிறுமிக்கு பாலியல் சீண்டல் அளித்த உறவினர், அப்பகுதியில் இருக்கும் மற்றொரு சிறுவன் மற்றும் வேறு ஒரு நபர் என மூன்று பேரை கைது செய்து விசாரணை மேற்கொண்டு வருகின்றனர்.
மேலும், சிறுமியிடம் வேறு யாரெல்லாம் தகாத முறையில் நடந்து கொண்டனர் என்பது குறித்து போலீசார் தீவிர விசாரணை மேற்கொண்டு வருகின்றனர். அதன் பின்னர், பாதிக்கப்பட்ட சிறுமிக்கு மருத்துவ சிகிச்சை அளிக்கவும் அனைத்து மகளிர் காவல் துறையினர் ஏற்பாடு செய்துள்ளனர்.
இதையும் படிங்க: குண்டூசியை விழுங்கிய 14 வயது சிறுமி.. அறுவை சிகிச்சையின்றி அகற்றி மருத்துவர்கள் சாதனை!
