“வன்னியர்களுக்கான இட ஒதுக்கீடு தகர்ந்தது” - ஜி.கே.மணி பேச்சு! - GK Mani slams Caste Wise Census

GK Mani MLA: தமிழ்நாடு சட்டப்பேரவையில் தமிழ்நாட்டில் ஏன் அரசால் பூரண மதுவிலக்கு கொண்டுவர இயலவில்லை எனக் கேள்வியெழுப்பிய பாமக எம்எல்ஏ ஜி.கே.மணி, சாதிவாரி மக்கள்தொகை கணக்கெடுப்பை மத்திய அரசே நடத்த வலியுறுத்தி முதலமைச்சர் மு.க.ஸ்டாலின் கொண்டுவந்த தனித் தீர்மானத்தால் வன்னியர்களுக்கான 10.5% இட ஒதுக்கீட்டை தகர்த்துள்ளதாகவும் குற்றம்சாட்டியுள்ளார்.

சென்னை: தமிழ்நாடு சட்டப்பேரவை பல்வேறு துறைகள் மீதான மானிய கோரிக்கை குறித்த விவாதம் ஜூன் 20 முதல் தொடங்கி நடைபெற்று வருகிறது. தமிழ்நாட்டிற்கு நீட் தேர்வில் விலக்கு, நாடு முழுவதும் சாதிவாரி மக்கள்தொகை கணக்கெடுப்பு நடத்தக்கோரி மத்திய அரசை வலியுறுத்தி ஏற்கனவே இக்கூட்டத் தொடரில், அரசு தீர்மானங்கள் நிறைவேற்றியுள்ளது. இதைத் தொடர்ந்து, இன்று (சனிக்கிழமை) மதுவிலக்கு அமலாக்க திருத்தச் சட்டத்தை முதலமைச்சர் மு.க.ஸ்டாலின் சட்டப்பேரவையில் தாக்கல் செய்தார்.

இக்கூட்டத்தொடர் முடிவுற்றுள்ள நிலையல், பாமக சட்டமன்ற உறுப்பினர் ஜி.கே.மணி செய்தியாளர்களைச் சந்தித்தார். அப்போது பேசிய அவர், 'பொதுவாக சட்டப்பேரவையில் மானிய கோரிக்கைகள் மீதான விவாதம் ஒரு மாதத்திற்கு மேல் நடைபெறும். ஆனால், ஒரு வாரமே நடந்துள்ள இந்த கூட்டத்தொடரில் சட்டப்பேரவை குறைந்தபட்சம் 100 நாட்களாவது நடக்க வேண்டும். ஆனால், ஒரு வாரத்தில் முடிக்கப்பட்டுள்ளது.

வன்னியர்களுக்கான 10.5% இட ஒதுக்கீடு: இந்த சட்டப்பேரவை கூட்டத்தொடரில் மிகப்பெரிய அதிர்ச்சியும், ஏமாற்றமும் ஆதங்கமும் உள்ளது. கடந்த அதிமுக ஆட்சிக் காலத்தில் வன்னியர்களுக்காக அறிவிக்கப்பட்ட 10.5 விழுக்காடு இட ஒதுக்கீடு ஆட்சி மாற்றத்திற்கு பின் திமுக ஆட்சியில் அதற்கான நடவடிக்கை தொடரப்பட்டது. இத்தனை ஆண்டுகாலம் வன்னியர்களுக்கு இட ஒதுக்கீடு கிடைக்கும் என்ற எதிர்பார்ப்பை, இந்த சட்டப்பேரவை தகர்த்துள்ளது.