திருப்பத்தூர்: திருப்பத்தூர் மாவட்டம், ஆம்பூர் அடுத்த சோலூர் பகுதியில் தேநீர் கடை நடத்தி வருபவர் சையது அலி (39). இவர் சோலூர் ஊராட்சி 9வது வார்டு உறுப்பினராக உள்ளார். அவருடைய தம்பி ரஃபிக் (38). இருவரும் சேர்ந்து, சோலூர் பகுதியில் தேசிய நெடுஞ்சாலை ஒட்டி உள்ள இடத்தில் வாடகைக்கு கடை எடுத்து, தேநீர் கடையை நடத்தி வருகின்றனர்.
இந்த நிலையில், அதே பகுதியைச் சேர்ந்த அரவிந்த் (27) என்பவர், நண்பர்களுடன் வந்து 50 ரூபாய்க்கு பஜ்ஜி வாங்கி உள்ளார். அப்போது பஜ்ஜியின் அளவு சிறிதாகவும், சூடாக இல்லை எனவும் கேட்டு, கடையின் உரிமையாளர் சையத் அலியிடம் அரவிந்த் தகராறில் ஈடுபட்டுள்ளார்.
பின்னர் இச்சம்பவம் கைகலப்பாக மாறிய நிலையில், உடனடியாக அரவிந்தின் உறவினர்களான விமல் (35) மற்றும் விஜய் (30) ஆகியோர் வேகமாக வந்து, கடையில் இருந்த சையது அலி மற்றும் அவரது சகோதரர் ரஃபிக் ஆகியோரை அரிவாளால் சரமாரியாக வெட்டி உள்ளனர். இதில் இருவருக்கும் கையில் பலத்த காயம் ஏற்பட்டுள்ளது.
அதைத் தொடர்ந்து, கடையில் பஜ்ஜி சுட்டு வைக்கப்பட்டிருந்த சூடான எண்ணெய்யை எடுத்து, ரஃபிக் மற்றும் சையத் அலி ஆகியோர் விமல் மீது ஊற்றியுள்ளனர். இதில் விமலுக்கு இடதுகை மற்றும் மார்பில் காயம் ஏற்பட்டது. மேலும், அங்கிருந்த பொதுமக்கள், மூன்று பேரையும் மீட்டு, ஆம்பூர் அரசு மருத்துவமனைக்கு சிகிச்சைக்காக அனுப்பி வைத்தனர்.
அங்கு அவர்கள் மூன்று பேருக்கும் முதலுதவி சிகிச்சை அளிக்கப்பட்டு, வேலூர் மருத்துவக் கல்லூரி மருத்துவமனைக்கு மேல் சிகிச்சைக்காக அனுப்பி வைத்தனர். பின்னர் இது குறித்து தகவல் அறிந்து சம்பவ இடத்திற்கு வந்த ஆம்பூர் கிராமிய காவல்துறையினர் விசாரணை மேற்கொண்டனர்.
மேலும், சம்பவ இடத்திற்கு வந்த வேலூர் மாவட்ட காவல் கண்காணிப்பாளர் மணிவண்ணன் (பொறுப்பு), மோதல் நடந்த இடத்தை ஆய்வு செய்து, கிராமம் முழுவதும் ஆம்பூர் மற்றும் வாணியம்பாடி துணை காவல் கண்காணிப்பாளர்கள் தலைமையில் 100க்கும் மேற்பட்ட காவலர்களை பாதுகாப்புப் பணியில் அமர்த்துமாறு உத்தரவு பிறப்பித்தார்.
பின்னர் சையத் அலி, அவரது சகோதரர் ரஃபிக் ஆகியோரை அரிவாளால் வெட்டிய அரவிந்த் மற்றும் விஜய் ஆகியோரை கைது செய்து, அவர்கள் மீது வழக்குப் பதிவு செய்து சிறையில் அடைத்தனர். மேலும், படுகாயம் அடைந்த விமல் கொடுத்த புகாரின் பேரில், சையத் அலி மற்றும் அவரது சகோதரர் ரஃபிக் மீதும் வழக்குப் பதிவு செய்துள்ளனர்.
இதையும் படிங்க: பார்க்கிங் பட பாணியில் நடிகர் பிர்லா போஸ்-க்கு வந்த பிரச்னை.. மகனை தாக்கியதாக புகார்!
