தென்காசி: கூகுள் பிளே ஸ்டோரில் கிரைண்டர் (Grindr - Gay Dating App) என்ற செயலி பயன்பாட்டில் இருந்து வருகிறது. இந்த செயலியில் முன் பின் தெரியாத நபர்களிடம் தகவல் பரிமாற்றம் (Chat) செய்யும் வசதி உள்ளது. இந்த செயலியின் மூலம் சில நபர்கள், குற்ற நோக்கத்துடன் பொதுமக்களை குறிப்பாக, இளம் வயதினரை குறி வைத்து ஏமாற்றி ஆசை வார்த்தைகளைக் கூறி, தனிமையில் சந்தித்து குற்றச் செயல்களில் ஈடுபட்டு வருவதும், அதன் மூலம், பணம் மற்றும் மதிப்புமிக்க பொருட்களை வழிப்பறி செய்து வருவதாகவும் தொடர்ந்து புகார்கள் வந்த வண்ணம் உள்ளன.
தென்காசி மாவட்டத்தில் கிரைண்டர் செயலி மூலம் ஒருவரை சுரண்டை பகுதிக்கு வரவழைத்து, அவரை தாக்கி பணம், செல்போன் மற்றும் நகைகளைப் பறித்துச் சென்றது சம்பந்தமாக சுரண்டை காவல் நிலையத்தில் வழக்குப் பதிவு செய்யப்பட்டு, அதில் சம்பந்தப்பட்ட குற்றவாளிகளை மாவட்ட காவல் கண்காணிப்பாளர் உத்தரவின் பேரில் தனிப்பிரிவு அமைக்கப்பட்டு, பல்வேறு கோணங்களில் விசாரணை நடைபெற்று வந்தது. இந்த விசாரணையின் முடிவில், தனிப் பிரிவு காவல்துறை பல்வேறு இடங்களில் 9 பேரை கைது செய்துள்ளனர்.
இதையும் படிங்க: வடகிழக்கு பருவமழை எப்போது துவங்கும்? - சென்னை வானிலை ஆய்வு மைய தலைவர் கொடுத்த அசத்தல் அப்டேட்!
தொடர்ந்து, தலைமறைவாக உள்ள முக்கிய நபர்களை தனிப்படை அமைத்து தேடி வருகின்றனர். பொதுமக்களும் இது போன்ற குற்றச் செயல் புரியும் எண்ணத்தோடு சமூக வலைத்தளங்கள், பிற தகவல் ஊடகங்கள் ஆகியவற்றிலும் தங்களை அணுகும் நபர்களிடம் எச்சரிக்கையாக இருக்கவும், இதுபோன்ற ஏமாற்று செயலின் மூலம் பாதிக்கப்படாமல் கவனமாக இருக்கவும் காவல்துறை அறிவுறுத்தியுள்ளது.
இதுபோன்ற குற்றச் செயல்களால் பாதிக்கப்படுபவர்கள் புகார் கொடுக்க தயங்காமல் உடனடியாக காவல் துறைக்கு தகவல் தெரிவிக்க மாநில காவல் கட்டுப்பாட்டு அறை தொடர்பு எண் 100, அல்லது தென்காசி மாவட்ட காவல் கட்டுப்பாட்டு அறை எண் 98840 42100 என்ற எண்ணிலோ தொடர்பு கொண்டோ அல்லது வாட்சப் மூலம் தகவல் தெரிவிக்கலாம்.
கிரைண்டர் செயலி மற்றும் அதைப் போன்று வேறு செயலிகளை பயன்படுத்தி பொதுமக்களை மிரட்டி வழிப்பறி செய்யும் நபர்கள் மீது குண்டர் சட்டத்தின் கீழ் கடுமையான நடவடிக்கை எடுக்கப்படும் என்று தென்காசி மாவட்ட காவல் கண்காணிப்பாளர் எச்சரிக்கை விடுத்துள்ளார்.
ஈடிவி பாரத் தமிழ்நாடு வாட்ஸ் சேனல் மூலம் செய்திகளை உடனுக்குடன் அறிய இங்கே க்ளிக் செய்யவும்
