புதுக்கோட்டை: புதுக்கோட்டை மருத்துவக் கல்லூரி மருத்துவமனை அருகே, திமுக சார்பில் கோடை கால தண்ணீர் பந்தல் இன்று (மே 12) திறந்து வைக்கப்பட்டது. இதனை சட்டத்துறை அமைச்சர் ரகுபதி திறந்து வைத்தார். மேலும், இந்த நிகழ்ச்சியில் திமுக நிர்வாகிகள் கலந்து கொண்டனர்.
இதனைத் தொடர்ந்து, சட்டத்துறை அமைச்சர் ரகுபதி செய்தியாளர்களைச் சந்தித்துப் பேட்டியளித்தார். அப்போது, டெல்லி முதல்வர் அரவிந்த் கெஜ்ரிவாலுக்கு இடைக்கால ஜாமீன் வழங்கியது தொடர்பாக கேட்கப்பட்ட கேள்விக்குப் பதிலளித்த அவர், "அமலாக்கத்துறை எதிர்ப்பு தெரிவித்தாலும் ஜனநாயக கடமை ஆற்றுவதற்கு ஒரு கட்சியில் தலைவர் என்ற முறையில் அரவிந்த் கெஜ்ரிவாலுக்கு உரிமை உண்டு.
அவர்தான் ஆம் ஆத்மி கட்சியின் தலைவர். அவர் கட்சிக்காக தேர்தல் பணியாற்ற வேண்டியது அவசியம். டெல்லி, பஞ்சாப் உள்ளிட்ட பல்வேறு மாநிலங்களில் தேர்தல் பணி என்பது தேவையானது. எனவே, அவருக்கு உச்ச நீதிமன்றம் இடைக்கால ஜாமீன் வழங்கி தேர்தல் பணியாற்ற அனுமதித்துள்ளது வரவேற்கத்தக்கது" என்று கூறினார்.
இந்தியா கூட்டணி குறித்து பிரதமர் நரேந்திர மோடியின் விமர்சனம் குறித்த கேள்விக்கு, "இந்தியா கூட்டணியை அவர் தாக்கி பேசுவதே, பாஜக கூட்டணி தோல்வி பாதையில் சென்று கொண்டிருக்கிறது என்பதற்கு எடுத்துக்காட்டு. குறிப்பாக, குஜராத் மாநிலத்தில் 10 தொகுதியில் பாஜக வெற்றி பெறுவதே ஆச்சரியம்தான்.
பாரதிய ஜனதா கூட்டணியில் தேர்தல் ஆணையமும் உள்ளது. தேர்தல் முடிந்து இந்தியா கூட்டணி ஆட்சி அமைந்த பிறகு இதற்கு தகுந்த நடவடிக்கை எடுக்கப்படும்" என்று பதிலளித்துள்ளார்.
மேலும் தொடர்ச்சியாக பேசிய அவர், "சவுக்கு சங்கர் விவகாரத்தில் காவல்துறை உரிய சாட்சியங்களோடு தகுந்த நடவடிக்கை எடுத்து வருகிறது. சவுக்கு சங்கர் மீது பொய் வழக்கு போட வேண்டிய அவசியம் திமுக அரசுக்கு கிடையாது. வரும் நாடாளுமன்றத் தேர்தலில் 40க்கு 40 தொகுதிகளில் திமுக கூட்டணி வெற்றி பெறும். திமுக அரசின் மூன்றாண்டு கால ஆட்சிக்கு கிடைத்த பரிசு.
எதிர்கட்சித் தலைவர் எடப்பாடி பழனிசாமி, எதிர்கட்சித் தலைவராக பணியாற்ற வேண்டும். அப்பொழுதுதான் உண்மையான எதிர்கட்சியாக இருக்கும். அதனை விட்டுவிட்டு வேறு விதமான விமர்சனங்கள் செய்வதில் அவர் ஈடுபட்டால், அவருடைய பதவிக்கு அது ஆபத்தாக அமைந்துவிடும்.
இருந்தாலும் அவருடைய பிறந்த நாளில், அவருடைய பதவிக்கு ஆபத்து ஏற்பட்டுவிடும் என்று சொல்வது அழகல்ல. அவர் பல நாட்கள் வாழ வேண்டும் என்று திமுக சார்பில் வாழ்த்துகிறோம். ஜூன் 4ஆம் தேதிக்குப் பிறகு எடப்பாடி பழனிசாமி தலைமையிலான அதிமுக செங்கோட்டையன் தலைமையில் செல்கிறதா அல்லது வேலுமணி தலைமையில் செல்கிறதா என்பது தெரியவரும்.
அதிமுகவில் எடப்பாடி பழனிசாமிக்கு பதிலாக செங்கோட்டையன் பொறுப்பேற்க வேண்டும் என்று ஏற்கனவே ஜெயக்குமார் சொல்லியிருக்கிறார். அதை திமுக செய்ய மாட்டோம். ஆனால், பாஜக செய்யும்" என்று தெரிவித்தார்.
இதையும் படிங்க: அதிமுகவில் இருந்து ஆரம்பித்த விஜய்.. எடப்பாடி பழனிசாமிக்கு பிறந்தநாள் வாழ்த்து!
