சென்னை: தமிழக அரசின் தோட்டக்கலை, மலைப் பயிர்கள் துறை சார்பில் கடந்த 2022ஆம் ஆண்டு முதல் சென்னையில் மலர் கண்காட்சி நடத்தப்பட்டு வருகிறது. அந்த வகையில் சென்னையின் நான்காவது மலர் கண்காட்சி ஜனவரி இரண்டாம் தேதி தொடங்கி ஜனவரி 11-ஆம் தேதி வரை 10 நாட்கள் நடைபெற உள்ளது.
இது தொடர்பாக வேளாண்மை மற்றும் விவசாயிகள் நலத்துறை அமைச்சர் எம்.ஆர்.கே பன்னீர்செல்வம் செம்மொழி பூங்காவில் ஆய்வு செய்த பிறகு செய்தியாளர்களை சந்தித்து பேசினார். அப்போது பேசிய அவர், "சென்னையின் நான்காவது மலர் கண்காட்சியை செம்மொழி பூங்காவில் தமிழ்நாடு முதலமைச்சர் மு.க ஸ்டாலின் ஜனவரி 2ஆம் தேதி காலை 10 மணிக்கு தொடங்கி வைக்க உள்ளார்.
இந்த மலர் கண்காட்சியில் 50 வகையான மலர்களுடைய 30 லட்ச மலர் தொட்டிகள் கண்காட்சிக்காக வைக்கப்படும் வகையில் அனைத்து ஏற்பாடுகளும் செய்யப்பட்டுள்ளது. மேலும், இந்த மலர்களை யானை, மயில், ரயில், ஆமை, படகு, வண்ணத்துப்பூச்சி, அன்னப்பறவை, நடனமங்கை என 20 வகையான வடிவங்கள் அமைக்கப்பட உள்ளது. ஊட்டி, ஏற்காடு, கொடைக்கானல், கிருஷ்ணகிரி, உள்ளிட்ட பகுதிகளில் இருந்து மலர்கள் வரவழைக்கப்பட்டு இங்கு காட்சிப்படுத்தப்படுகிறது. இந்த மலர் கண்காட்சியின் கட்டணம் விவரம் குறித்து விரைவில் அறிவிப்பு வெளியாகும்.
முதல்முறையாக சென்னையில் கடந்த 2022ஆம் ஆண்டு கலைவாணர் அரங்கில் இந்த மலர் கண்காட்சி நடைபெற்றது. அப்போது 44 ஆயிரத்து 888 பேர் பார்வையிட்டனர். இதையடுத்து கடந்த ஆண்டு (2023) ஜூன் மாதம் செம்மொழி பூங்காவில் இரண்டாவது முறையாக மலர் கண்காட்சி நடைபெற்றது. அதில் 23 ஆயிரத்து 302 பேர் பார்வையிட்டனர்.
அதேபோல், 2024ஆம் ஆண்டின் பிப்ரவரி மாதம் கலைஞர் நூற்றாண்டு விழாவை சிறப்பிக்கும் வகையில் மூன்றாவது முறையாக இந்த மலர் கண்காட்சி நடைபெற்றது. இதில் 1 லட்சத்து 9 ஆயிரத்து 27 பேர் பார்வையிட்டனர்.
இதையும் படிங்க: புத்தாண்டில் உச்சம் தொட்ட மதுரை மல்லி விலை - ஒரு கிலோ எவ்வளவு தெரியுமா?
ஜனவரி இரண்டாம் தேதி தொடங்கி ஜனவரி 11 ஆம் தேதி வரை 10 நாட்கள் நடைபெற உள்ள இந்த மலர் கண்காட்சியை அமர்ந்து பார்க்கக் கூடிய ஏற்பாடுகள் செய்ய வேண்டும் என மக்கள் கோரிக்கை வைத்திருக்கும் நிலையில் இதுகுறித்து நடவடிக்கை எடுக்கப்படும்," என்றார்.
இதையடுத்து புதிதாக உருவாக்கப்பட்டுள்ள கலைஞர் நூற்றாண்டு பூங்காவால் செம்மொழிப் பூங்கா கைவிடப்படுமா? என செய்தியாளர்கள் கேட்ட கேளிவிக்கு பதிலளித்த அமைச்சர், "செம்மொழிப் பூங்கா அமைந்துள்ள அதே பகுதியில் கடந்த 2024 அக்டோபர் 7ஆம் தேதி புதிதாக திறக்கப்பட்ட கலைஞர் நூற்றாண்டு பூங்காவை இதுவரை ஒரு லட்சத்து 86 ஆயிரத்து 580 பேர் பார்வையிட்டுள்ளனர். செம்மொழிப் பூங்காவிற்கும் கலைஞர் நூற்றாண்டு பூங்காவிற்கும் இணைப்பு பாலம் கட்டுவதற்கு முதலமைச்சர் மு.க ஸ்டாலின் உத்தரவிட்டுள்ளார்," என்றார்.
