திண்டுக்கல்: நாடாளுமன்றத் தேர்தல் வரும் ஏப்ரல் 19ஆம் தேதி தொடங்கி ஏழு கட்டங்களாக நடைபெறும் என அறிவிக்கப்பட்டுள்ளது. இதனையடுத்து அரசியல் கட்சிகள் பலரும் தங்களது தேர்தல் பணிகளை துரிதப்படுத்தி வருகின்றனர்.
அந்த வகையில் தமிழ்நாட்டில் ஆளும் கட்சியான திமுக தங்களுடைய கூட்டணி கட்சிகளுடன் சுமூகமாக தொகுதி பங்கீட்டை நிறைவு செய்துள்ளது. இதில் திமுக கூட்டணியில் அங்கம் வகிக்கும் மார்க்சிஸ்ட் கம்யூனிஸ்ட் கட்சிக்கு மதுரை மற்றும் திண்டுக்கல் ஆகிய இரண்டு தொகுதிகள் ஒதுங்கீடு செய்யப்பட்டது.
இதில் திண்டுக்கல் தொகுதியில் ஆர்.சச்சிதானந்தம் போட்டியிடுகிறார், அதே போல் மதுரை தொகுதியில் சிட்டிங் எம்பியான சு.வெங்கடேசன் மீண்டும் போட்டியிடுகிறார். இது குறித்து அதிகாரப்பூர்வ அறிவிப்பு வெளியானதும், கூட்டணிக் கட்சித் தலைவர்களை நேரில் சந்தித்து சு.வெங்கடேசன் மற்றும் ஆர்.சச்சிதானந்தம் ஆகியோர் வாழ்த்துக்கள் பெற்று வருகின்றனர்.
அந்த வகையில் நேற்று (ஞாயிற்றுக்கிழமை) திண்டுக்கல் வருகை தந்த வேட்பாளர் ஆர்.சச்சிதானந்தம் மற்றும் மார்க்சிஸ்ட் கம்யூனிஸ்ட் கட்சியின் மாநில செயலாளர் கே.பாலகிருஷ்ணன் ஆகியோர் தமிழ்நாடு ஊரக வளர்ச்சித் துறை அமைச்சரும், திராவிட முன்னேற்றக் கழகத்தின் துணைப் பொதுச் செயலாளருமான ஐ.பெரியசாமியை அவரது இல்லத்தில் சந்தித்து வாழ்த்து பெற்றனர்.
இதனையடுத்து செய்தியாளர்களை சந்தித்த அமைச்சர் ஐ.பெரியசாமி பேசுகையில், "திண்டுக்கல் நாடாளுமன்ற தொகுதியின் வெற்றி உறுதியாகிவிட்டது. தமிழ்நாட்டில் அதிக வாக்கு வித்தியாசத்தில் திண்டுக்கல் தொகுதி வெற்றி பெறும்.
இந்த வெற்றி இந்தியாவிற்கே வழிகாட்டும். நாளை நடைபெறும் திமுக கூட்டத்திற்கு பிறகு தேர்தல் பிரச்சாரம் எப்போது என அறிவிக்கப்படும். பிரச்சாரத்தில் வைக்கக்கூடிய முக்கிய கோரிக்கை மாநில உரிமைகளை மீட்பது தான்.
மாநிலங்களின் வளங்கள் உரிமைகள் அனைத்தையும் மீட்பது தான் நம்முடைய போராட்டம். ஜனநாயகம் என்ற போர்வையில் இந்தியாவில் சர்வாதிகார ஆட்சி நடைபெற்று வருகிறது. அதை முடிவது முறியடிப்பதற்கு இந்தியா கூட்டணி என்ற மாபெரும் கூட்டணியை உருவாக்கி முதல்வர் ஸ்டாலின் தலைமையில் மார்க்சிஸ்ட் கம்யூனிஸ்ட் கட்சி உட்பட இந்த தேர்தலில் களம் காண்கிறோம்.
மார்க்சிஸ்ட் கம்யூனிஸ்ட் கட்சிக்கு திண்டுக்கல் தொகுதி ஒதுக்கீடு செய்யப்பட்டது பெருமையாக உள்ளது. 1967ஆம் ஆண்டு திமுக ஆட்சி பீடம் ஏறுவதற்கு உறுதி இணையாக இருந்த இயக்கம் மார்க்சிஸ்ட் கம்யூனிஸ்ட் கட்சி. இன்று வரை அந்த கூட்டணி தொடர்கிறது.கொள்கையில் உறுதியாக இருக்கக்கூடிய கட்சிகள் அனைத்தும் ஒரே அணியில் நிற்கின்றன.
கொள்கை இல்லாத கட்சிகள் மாற்று அணியில் உள்ளனர். கொள்கையோடு இருக்கின்ற எங்களை மக்கள் நிச்சயமாக அங்கீகரிப்பார்கள். நாளை தேர்தலை அறிவித்தாலும் கூட நாங்கள் நிச்சயமாக வெற்றி பெறுவோம்" என தெரிவித்தார்.
இதையும் படிங்க: தமிழிசை செளந்தரராஜன் ஆளுநர் பதவியை ராஜினாமா செய்ததாக தகவல்!
