சென்னை: சென்னையில் இருந்து மலேசியா தலைநகர் கோலாலம்பூர் செல்லும் மலேசியா ஏர்லைன்ஸ் பயணிகள் விமானம் நேற்று நள்ளிரவு 12:30 மணிக்கு சென்னை விமான நிலையத்தில் இருந்து கோலாலம்பூர் புறப்பட தயாரானது. விமானத்தில் 168 பயணிகள், 12 விமான ஊழியர்கள் மொத்தம் 180 பேர் இருந்தனர். விமானம் ஓடுபாதையில் ஓடத் தொடங்குவதற்கு முன்னதாக விமானத்தின் இயந்திரங்களை விமானி சரிபார்த்த போது விமானத்தில் இயந்திர கோளாறு இருப்பதை கண்டுபிடிக்கப்பட்டது.
இந்த நிலையில் விமானத்தை இயக்கினால் ஆபத்து என்பது உணர்ந்த விமானி, உடனடியாக சென்னை விமான நிலைய கட்டுப்பாட்டு அறைக்கு அவசரமாக தகவல் தெரிவித்ததை அடுத்து, விமானத்தின் கதவுகள் திறக்கப்பட்டு விமான பொறியாளர்கள் குழுவினர் விமானத்துக்குள் ஏறி இந்திரங்களை சீர் செய்யும் முயற்சியில் ஈடுபட்டனர். ஆனால் நீண்ட நேரம் ஆகியும், விமானத்தின் இயந்திரங்களை சரி செய்ய முடியவில்லை. இதனால் விமானம் தாமதமாக புறப்பட்டு செல்லும் என்று அறிவிக்கப்பட்டது.
இதையும் படிங்க: ஏ.சி.பி இளங்கோவனுக்கு எதிரான மனித உரிமைகள் ஆணையத்தின் உத்தரவுக்கு தடை!
இந்த சம்பவம் சென்னை விமான நிலையத்தில் பெரும் பரபரப்பை ஏற்படுத்தி உள்ளது. அதன் பின் பயணிகள் அனைவரும் விமானத்தில் இருந்து கீழே இறக்கப்பட்டு சென்னை நகரில் உள்ள பல்வேறு ஹோட்டல்களுக்கு சொகுசு பேருந்துகளில் அழைத்துச் செல்லப்பட்டு அங்கு தங்க வைக்கப்பட்டுள்ளனர்.
இயந்திர கோளாறு ஏற்பட்டுள்ள மலேசியா ஏர்லைன்ஸ் விமானம் இன்று பிற்பகல் சென்னையில் இருந்து மலேசியா புறப்பட்டு செல்லும் என்று அறிவிக்கப்பட்டுள்ளது. விமானத்தில் ஏற்பட்டுள்ள இயந்திர கோளாறை விமானி தகுந்த நேரத்தில் கண்டுபிடித்து எடுத்த துரித நடவடிக்கையால், நிகழவிருந்த அசம்பாவித சம்பவம் தவிர்க்கப்பட்டது.
ஈடிவி பாரத் தமிழ்நாடு வாட்ஸ் சேனல் மூலம் செய்திகளை உடனுக்குடன் அறிய இங்கே க்ளிக் செய்யவும்
