மதுரை: மதுரை எய்ம்ஸ் மருத்துவமனை கட்டுமானப் பணிக்கான அடிக்கல் பிரதமர் மோடியால் நாட்டப்பட்டு ஐந்து ஆண்டுகளுக்கு மேலாகும் நிலையில், திருமங்கலம் அருகே தோப்பூரில் எய்ம்ஸ் மருத்துவமனை அமைய உள்ள இடத்தில் இன்று முதற்கட்ட பூமி பூஜை எல் அண்ட் டி நிறுவனத்தால் (Larsen & Toubro Limited) செய்யப்பட்டது.
மதுரை தோப்பூரில் எய்ம்ஸ் மருத்துவமனை கட்டப்படும் என கடந்த 2018ஆம் ஆண்டு அறிவிக்கப்பட்டு 2019ஆம் ஆண்டு ஜனவரி மாதம் பிரதமர் மோடி மதுரையில் நடைபெற்ற விழாவில் அடிக்கல் நாட்டினார். 2018ஆம் ஆண்டு தொடங்கப்பட்ட 2023ஆம் ஆண்டு எய்ம்ஸ் மருத்துவமனை திறக்கப்படும் என அறிவிக்கப்பட்டு 5 ஆண்டுகளுக்கு மேலாக இதற்கான கட்டுமானப் பணிகள் துவங்காமலேயே இருந்து வந்தது.
இந்நிலையில், 870 படுக்கை வசதியுடன் மருத்துவமனை, 38 படுக்கைகளுடன் கூடிய ஆயுர்வேத சிகிச்சை மையம், மாணவர்கள், செவிலியர்களுக்கு என வகுப்பறை கட்டிடம், ஆய்வகக்கூடங்கள் உள்ளிட்ட பல்வேறு கட்டிடங்கள் கட்டுவதற்காக ரூ.1,624 கோடியாக அறிவிக்கப்பட்ட எய்ம்ஸ் மருத்துவமனை கட்டுவதற்கான முழு நிதியும் ஜப்பான் நாட்டை சேர்ந்தச் ஜெய்கா நிறுவனத்தின் மூலம் பெறப்படும் எனவும் அறிவிக்கப்பட்டிருந்தது.
கட்டுமானப் பணிகளுக்கான நிதி தற்போது மத்திய அரசு நிதியுடன் சேர்த்து ரூ.1977.80 கோடியாக மதிப்பிடப்பட்டுள்ளது. இதில் முதற்கட்டமாக எய்ம்ஸ் மருத்துவமனை அமைய உள்ள இடத்தில் 10 கோடி ரூபாய் மதிப்பீட்டில் 5 கிலோ மீட்டர் சுற்றளவுக்கு 12 அடி உயர சுற்றுச்சுவர் அமைக்கப்பட்டுள்ளது. எய்ம்ஸ் மருத்துவமனை அமைய உள்ள பகுதியில் 21 கோடி ரூபாய் மதிப்பீட்டில் ஆறு கிலோ மீட்டருக்கு சாலைப்பணிகளும் நிறைவடைந்துள்ளன.
தற்போது மதுரை எய்ம்ஸ் மருத்துவமனைக்கானக் கட்டுமானப் பணிகளை மேற்கொள்ளும் தனியார் கட்டுமான L&T நிறுவனம் சார்பில் முதற்கட்ட எய்ம்ஸ் மருத்துவமனை அமைய உள்ள இடத்தை சமன் செய்யும் வாஸ்து பூஜை செய்யப்பட்டது. இன்னும், ஓரிரு வாரங்களில் கட்டுமானப் பணிக்கான பூஜை தொடங்கும் என்றும், கட்டுமானப் பணிகள் தொடங்கப்பட்டு 33 மாதங்களுக்குள் முடிக்கப்பட வேண்டும் என்றும் அறிவிப்பு வெளியாகி உள்ளது. 950 படுக்கைளுடன், பத்து தளங்களுடன் மதுரை எய்ம்ஸ் மருத்துவமனை கட்டப்பட உள்ளது குறிப்பிடத்தக்கது.
இதையும் படிங்க: மதுரையில் பிரதமர் மோடியை சந்தித்தது ஏன்? - அமைச்சர் பிடிஆர் அளித்த விளக்கம்!
