சென்னை: சென்னை மெரினா கடற்கரை லூப் சாலையின் இரு புறமும் மீனவர்கள் மீன் வியாபாரத்தில் ஈடுபடுவதால் வாகன போக்குவரத்துக்கு இடையூறு ஏற்படுவது தொடர்பாக, சென்னை உயர் நீதிமன்றம், தாமாக முன் வந்து வழக்கை விசாரணைக்கு எடுத்துக் கொண்டது.
இந்த வழக்கு நீதிபதிகள் சுரேஷ்குமார் மற்றும் ஜெகதீஷ் சந்திரா அமர்வில் விசாரணைக்கு வந்த போது, சென்னை மாநகராட்சி தரப்பில் ஆஜரான கூடுதல் தலைமை வழக்கறிஞர் ரவீந்திரன், லூப் சாலையில் கட்டப்பட்டுள்ள மீன் சந்தையில் உள்ள 360 கடைகளில், 357 கடைகள் ஒதுக்கீடு திங்கள் கிழமை முதல் துவங்கப்படும் எனவும், பயனாளிகளின் பட்டியலும் இறுதி செய்யப்பட்டுள்ளதாகவும், விடுபட்டவர்களுக்கு மாற்று ஏற்பாடுகள் செய்யப்படும் எனவும் தெரிவித்தார்.
இதை பதிவு செய்த நீதிபதிகள், மீன் கடைகள் ஒதுக்கீட்டு பணிகளை தொடரவும், பயனாளிகள் பட்டியலுடன் அறிக்கை தாக்கல் செய்யவும் உத்தரவிட்டு, விசாரணையை இரு வாரங்களுக்கு தள்ளிவைத்தனர்.
இதற்கிடையில், சென்னை மெரினா கடற்கரையில் தள்ளு வண்டிகள் ஒதுக்கீட்டில் மாற்றுத் திறனாளிகளுக்கு 5 சதவீத இட ஒதுக்கீடு கோரிய வழக்கில், இந்த திட்டத்தின் தற்போதைய நிலை குறித்து தெரிவிக்கும்படி, சென்னை மாநகராட்சிக்கு உத்தரவிட்டு, விசாரணையை இரண்டு வாரங்களுக்கு தள்ளி வைத்தனர்.
இதையும் படிங்க: 'இதற்கு தானே சுதந்திரம் பெற்றோம்'.. மக்களின் குரலை ஒடுக்க வேண்டுமா? - நீதிபதிகள் சரமாரி கேள்வி!
