மதுரை: நெல்லை மாவட்டம் ஜோதிபுரம் கிராமத்தில் களம் புறம்போக்கு பகுதியில் சூப்பர் மார்க்கெட் கட்டுவதற்கு தடை விதிக்க உத்தரவிடக் கோரி, பாளையங்கோட்டையைச் சேர்ந்த நடராஜன் சென்னை உயர் நீதிமன்ற மதுரை அமர்வில் பொதுநல வழக்கு ஒன்றைத் தாக்கல் செய்திருந்தார்.
அதில், "பாளையங்கோட்டை தாலுகா ஜோதிபுரம் கிராமத்தில் உள்ள களம் புறம்போக்கு நிலத்தில் 2 கோயில்கள், 21 புனித பீடங்கள் மற்றும் முன்னாள் அமைச்சர் கக்கன் நினைவு படிப்பகம் அமைந்துள்ளது. அதோடு இந்த பகுதியை களத்து மேடாக இப்பகுதி விவசாயிகள் பயன்படுத்தி வருகின்றனர். இந்நிலையில் களம் புறம்போக்கு பகுதியில் சூப்பர் மார்க்கெட் கட்டுவதற்கான நடவடிக்கையில் நெல்லை மாவட்ட நிர்வாகம் ஈடுபட்டுள்ளது.
கிராம மக்களிடம் இது தொடர்பாக எவ்விதமான கருத்து கேட்பும் நடத்தாமல், மாவட்ட நிர்வாகம் இந்த முயற்சியை எடுத்து வருவது ஏற்கத்தக்கது அல்ல. இது தொடர்பாக அதிகாரிகளிடம் மனு அளித்தும் எவ்வித நடவடிக்கையும் இல்லை. ஆகவே நெல்லை மாவட்டம் ஜோதிபுரம் கிராமத்தில் களம் புறம்போக்கு பகுதியில் சூப்பர் மார்க்கெட் கட்டுவதற்கு தடை விதித்து உத்தரவிட வேண்டும்" என கூறியிருந்தார்.
இந்த வழக்கு நீதிபதிகள் எம்.எஸ்.ரமேஷ் மற்றும் மரிய கிளாட் ஆகியோர் அடங்கிய அமர்வின் கீழ் விசாரணைக்கு வந்தது. அப்போது வழக்கை விசாரித்த நீதிபதிகள், "களம் புறம்போக்கு நிலத்தை விவசாய பயன்பாட்டிற்கு மட்டுமே பயன்படுத்த வேண்டும் என ஏற்கனவே உயர் நீதிமன்றம் அறிவுறுத்தி உள்ளது எனக் குறிப்பிட்டு, களம் புறம்போக்கு பகுதியில் சூப்பர் மார்க்கெட் கட்டுவதற்கு இடைக்காலத் தடை விதித்து உத்தரவிட்டனர்.
மேலும், பல்பொருள் அங்காடி கட்டுவதற்கு வேறு இடத்தை தேர்வு செய்ய அறிவுறுத்திய நீதிபதிகள், இந்த வழக்கு தொடர்பாக நெல்லை மாவட்ட ஆட்சியர் மற்றும் நெல்லை நகராட்சியின் ஆணையர் பதில் மனுத் தாக்கல் செய்ய வேண்டும் என உத்தரவிட்டு, வழக்கு விசாரணையை டிசம்பர் மாதம் 12ஆம் தேதிக்கு ஒத்தி வைத்தனர்.
