சேலம்: கேரள மாநிலம் சொரனூர் ரயில் நிலையத்தில் தூய்மை பணியில் இருந்த தமிழகத்தை சேர்ந்த 4 தூய்மை பணியாளர்கள் ரயில் விபத்தில் சிக்கி உயிரிழந்த நிலையில் அவரகளது உடல் சேலத்தில் இன்று தகனம் செய்யப்பட்டது
கேரள மாநிலம் பாலக்காடு அருகே பாரதப்புழா ஆற்றின் மீது சொரனூர் ரயில் நிலையம் உள்ளது. அங்கு தொழிலாளர்கள் பலர் நேற்று ரயில் பாதையில் இருந்த குப்பைகளை அகற்றும் பணியில் ஈடுபட்டிருந்தனர். அப்போது, அந்த ரயில் பாதையை கடந்த டெல்லி - திருவனந்தபுரம் எக்ஸ்பிரஸ் ரயில் மோதி லட்சுமணன், ராணி, வள்ளி உள்ளிட்ட நால்வர் உயிரிழந்தனர்.
இந்த சம்பவம் நடந்த போது பத்து தொழிலாளர்கள் பணியில் ஈடுபட்டதாகவும், அதில் ரயில் வருவதை அறிந்து ஆறு பேர் தண்டவாளத்தில் இருந்து வெளியே ஓடியதால் உயிர்த்தப்பியதாகவும் கூறப்படுகிறது. மேலும், இது தொடர்பாக போலீசார் வழக்குப் பதிவு செய்து தொடர்ந்து விசாரணை நடத்தி வருகின்றனர்.
விபத்தில் உயிரிழந்த நான்கு பேரும் சேலம் மாவட்டம் அயோத்தியபட்டணம் அடுத்த ஆச்சாங்குட்டப்பட்டி ஊராட்சிக்கு உட்ப்பட்ட அடிமலைப்புதூர் என்ற கிராமத்தைச் சேர்ந்தவர்கள் ஆவர். லட்சுமணன் அவரது மனைவி வள்ளி, காரைக்காடு கிராமத்தை சேர்ந்த வள்ளியின் தம்பி லட்சுமணன், அவரது மனைவி ராணி என்பதும் தெரியவந்துள்ளது.
இதையும் படிங்க: “அரசு விதித்த கட்டணத்தை விட அதிகமாக வசூலிக்கின்றனர்” தனியார் கல்லூரிக்கு எதிராக போராட்டத்தில் குதித்த மாணவர்கள்!
இதுமட்டும் அல்லாது, வள்ளிக்கு இரு மகன்கள் இருப்பதும், ராணிக்கு குழந்தைகள் இல்லை எனவும் விசாரணையில் தெரியவந்துள்ளது. இதற்கிடையில், உயிரிழந்தவர்களின் குடும்பத்தினருக்கு உரிய நிவாரணம் வழங்க பல்வேறு தரப்பினரும் வலியுறுத்தியுள்ளனர்.
இந்நிலையில் உயிரிழந்த நான்கு பேரின் உடல்களை பாலக்காடு அரசு மருத்துவமனையில் பிரேத பரிசோதனை செய்து ஆம்புலன்ஸ் வாகனம் மூலம் இன்று காலை சேலத்தில் உள்ள உறவினர்களிடம் ஒப்படைக்கப்பட்டது. பின்னர் அவர்களது சடலம் சேலம் மாநகர் காக்காயன் இடுகாட்டில் இன்று காலை தகனம் செய்யப்பட்டது. இதனிடையே உயிரிழந்த நான்கு பேரின் குடும்பத்தாருக்கு தமிழ்நாடு முதலமைச்சர் மு.க .ஸ்டாலின் தலா 3 லட்சம் ரூபாய் இழப்பீடு வழங்கி உத்தரவிட்டுள்ளார்.
ஈடிவி பாரத் தமிழ் வாட்ஸ்ஆப் சேனலில் இணைய இங்கே கிளிக் செய்யவும்.
