கோபிசெட்டிபாளையம்: ஈரோடு மாவட்டம் கோபியை சேர்ந்தவர் அருண் ரங்கராஜ் ஜ.பி.எஸ். இவர் கர்நாடக மாநிலம் கல்புர்கி மாவட்டத்தில் உள்நாட்டு பாதுகாப்பு பிரிவு (Internal security division) காவல்துறை கண்காணிப்பாளராக பணியாற்றி வந்தார். இவரது மனைவி இலக்கியா கர்நாடக மாநில முக்கிய பிரமுகர்களின் பாதுகாப்பு பிரிவு துணை ஆணையராக பணியாற்றி வந்தார்.
இந்த நிலையில், கடந்த 2012ம் ஆண்டு காவல்துறை பணியில் சேர்ந்த அருண் ரங்கராஜ், கர்நாடக மாநிலத்தில் பணியாற்றிய போது, அதே பிரிவில் சப் இன்ஸ்பெக்டராக இருந்த சுஜாதா என்பவருடன் திருமணத்தை மீறிய உறவு ஏற்பட்டுள்ளது. இதனால் மனைவி இலக்கியா கணவரை பிரிந்து சென்று விட்டார்.
இந்நிலையில், கடந்த பிப்ரவரி மாதம் அருண் ரங்கராஜ், சப் இன்ஸ்பெக்டர் சுஜாதாவுடன் கோபியில் உள்ள பெற்றோர் வீட்டிற்கு வந்தார். அங்கு இருவருக்குமிடைய தகராறு ஏற்பட்டு சுஜாதாவுக்கு சராமாரியாக அடி விழுந்துள்ளது. இதில் படுகாயமடைந்த சுஜாதா கோபி காவல் நிலையத்தில் புகார் கொடுத்துள்ளார். அதன் பேரில், வழக்குப்பதிவு செய்து அருண் ரங்கராஜை கைது செய்தனர்.
அதைத்தொடர்ந்து அருண் ரங்கராஜ் தற்காலிக பணி நீக்கமும் செய்யப்பட்டார். இந்நிலையில் கோபியில் உள்ள பெற்றோர் வீட்டில் இருந்த அருண் ரங்கராஜை பார்ப்பதற்காக சுஜாதா கடந்த 3 நாட்களுக்கு முன் கோபி வந்துள்ளார்.
அதைத்தொடர்ந்து வீட்டில் தங்கியிருந்தபோது இருவருக்கும் மூன்று நாட்களாக தகராறு ஏற்பட்டு வந்துள்ளது. இந்நிலையில் நேற்று சுஜாதாவை, அருண் ரங்கராஜ் தாக்கியதாக கூறப்படுகிறது. இந்த நிலையில் சுஜாதா வீட்டை விட்டு வெளியே ஓடி உயிர் தப்பிய நிலையில், ஆத்திரமடைந்த அருண் ரங்கராஜ் வீட்டிற்கு தீ வைத்து விட்டு வீட்டிற்குள்ளேயே இருந்துள்ளார்.
இதுகுறித்து அருகில் உள்ளவர்கள் அளித்த தகவலின் அடிப்படையில் கோபி காவல் ஆய்வாளர் காமராஜ் மற்றும் போலீசார் அங்கு சென்று வீட்டிற்குள் இருந்த அருண் ரங்கராஜை மீட்டதோடு, சம்பவம் குறித்து சுஜாதாவிடம் விசாரணை செய்து உள்ளனர்.
அப்போது ஆத்திரமடைந்த அருண் ரங்கராஜ், ஆய்வாளர் காமராஜை தாக்கியதாக கூறப்படுகிறது. இதில் ஆய்வாளர் காமராஜ் லேசான காயமடைந்த நிலையில் அருகில் இருந்த போலீசார் அருண் ரங்கராஜை மீட்டு காவல் நிலையம் அழைத்து விசாரணை நடத்தி வருகின்றனர். வீட்டிற்கு தீ வைத்ததில், வீட்டில் இருந்த கட்டில், மெத்தை, எல்.இ.டி. டிவி என பல லட்சம் ரூபாய் மதிப்புள்ள பொருட்கள் தீயில் எரிந்து சேதமானது.
ஈடிவி பாரத் தமிழ்நாடு வாட்ஸ் சேனல் மூலம் செய்திகளை உடனுக்குடன் அறிய இங்கே க்ளிக் செய்யவும்
இதையும் படிங்க: விஜய் பட தலைப்பில் 'சனாதனம்'? - விசிக எம்பி ரவிக்குமார் விமர்சனம்
