சென்னை: சென்னையில் உள்ள இந்திய தொழில்நுட்பக் கழகத்தின் (ஐஐடி மெட்ராஸ்) வரலாற்றில் எப்போதும் இல்லாத வகையில் ரூ.228 கோடி நன்கொடையை முன்னாள் மாணவர் விருது பெற்ற டாக்டர் கிருஷ்ணா சிவுகுல (எம்டெக்,1970) வழங்கியுள்ளார்.
அகில இந்திய அளவில் கல்வி நிறுவனம் ஒன்றுக்கு வழங்கப்பட்ட மிகப்பெரிய நன்கொடையை இதுவாகும். சென்னை ஐஐடி நிறுவன வளாகத்தில் இன்று நடைபெற்ற நிகழ்வில், டாக்டர் கிருஷ்ணா சிவுகுலவை கெளரவிக்கும் விதமாக கல்வி நிறுவன கட்டடம் ஒன்றுக்கு கிருஷ்ணா சிவுகுலா பிளாக் என பெயரிடப்பட்டுள்ளது.
இந்நிகழ்வில் டாக்டர் கிருஷ்ணா சிவுகுல, அவரின் மனைவி ஜெகதாம்பாள், சென்னை ஐஐடி இயக்குனர் வி.காமகோடி, ஐஐடி டீன் (முன்னாள் மாணவர்கள் மற்றும் கார்ப்பரேட் உறவுகள்) பேராசிரியர் மகேஷ் பஞ்சக்நுலா, ஆசிரியர்கள், ஆராய்ச்சியாளர்கள், ஊழியர்கள், மாணவர்கள் உள்ளிட்ட பலர் பங்கேற்றனர்.
இதுகுறித்து சென்னை ஐஐடி இயக்குனர் பேராசிரியர் வி.காமகோடி கூறுகையில், " சென்னையில் ஐஐடியில் படித்து முடித்து 53 வருடம் கழித்து கிருஷ்ணா சிவுகுல ரூ.228 கோடி நிதியுதவி வழங்குகிறார். இந்த நிதியை சென்னை ஐஐடியில் படித்து சிறந்த இடங்களை பிடிக்கும் மாணவர்களுக்கு பரிசுத் தொகை மற்றும் உதவி தொகை வழங்கவும், விளையாட்டு பிரிவில் சேர்ந்துள்ள மாணவர்களுக்கு உதவி தொகை வழங்கவும், சார்க் நாடுகளில் இருந்து சென்னை ஐஐடியில் வந்து படிக்கும் மாணவர்களுக்கு கல்வி உதவித்தொகை வழங்கவும், சிறந்த கண்டுபிடிப்புகள் குறித்து மக்களிடம் கொண்டு செல்ல ஏற்கனவே ஐஐடி சார்பில் வெளியிடப்பட்டு வரும் 'சாஸ்த்ரா' இதழை மாதம்தோறும் மாணவர்கள் படிக்கும் வகையில் கொண்டு வருவதற்கு இந்த உதவி தொகை பயன்படுத்தப்படும்.
மேலும், கடினமான துறைகளில் ஆராய்ச்சிகளை மேற்கொள்ள இந்த நிதியை பயன்படுத்த திட்டமிட்டுள்ளோம். சென்னை ஐஐடிக்கு வரும் நிதியுதவி அதற்கு முன்பே செலவிடும் வகையில் செலவு இருக்கிறது. ஐஐடிக்கு வரவு எட்டணா செலவு பத்தணா என்ற நிலையில் நிதி தேவைப்படுகிறது.
மாணவர்களின் கல்வித் தரத்தை மேம்படுத்தவும், வளத்தை மேம்படுத்தும் வகையில் பெறப்படும் நிதிகள் செலவிடப்படுகின்றன. கடந்தாண்டு ரூ.2500 கோடி நிதி செலவிடப்பட்டுள்ளது. மேலும், பல ஆண்டுகளுக்கு பிறகும் எங்களின் முன்னாள் மாணவர் ஒருவர் தாம் படித்த கல்வி நிறுவனத்தை நினைவில் வைத்து செயலாற்றுவது, கல்வி மட்டுமே மனிதகுலத்திற்கு நாம் அளிக்கக் கூடிய ஒரே அழியாத செல்வம் என்பதை வலுப்படுத்துவதாக அமைந்துள்ளது. கிருஷ்ணா சிவுகுலாவின் மிகப்பெரிய பங்களிப்பிற்காக நன்றி" என தெரிவித்தார்.
இதுகுறித்து சென்னை ஐஐடி டீன் கூறும்போது, "டாக்டர் கிருஷ்ணா சிவுகுல வெற்றிகரமான தொழில்நுட்ப தொழிலதிபர் மட்டுமல்ல, தலைசிறந்த முன்னாள் மாணவருமாவார். அவருடைய பணிவும், பெருந்தன்மையும் வரவிருக்கும் காலங்களில் முன்னாள் மாணவர்கள் பின்பற்ற வேண்டிய முன்மாதிரியான பண்புகளாகும்.
சென்னை ஐஐடிக்கு ரூ.228 கோடி ஒரே முறையில் அறுதியாக தருவது இதுவே முதல் முறையாகும். இந்த நிதியை 5 விதமான திட்டங்களுக்கு பயன்படுத்த திட்டமிட்டுள்ளோம். சென்னை ஐஐடியில் 800க்கும் மேற்பட்ட முன்னாள் மாணவர்கள் உள்ளனர்.
முன்னாள் மாணவர்கள் அதிக அளவில் நிதி உதவி அளிக்கும்போது ஆண்டிற்கு ஐந்து லட்சத்திற்கும் கீழ் குறைவான வருமானம் உள்ளவர்களுக்கு அந்த நிதி வழங்கப்படும். கல்வி உதவி தொகையை 8 லட்சம் வரை வருமானம் உள்ள பெற்றோர்களின் குழந்தைக்கு வழங்க திட்டமிட்டுள்ளோம்” என தெரிவித்தார்.
டாக்டர் கிருஷ்ணா சிவுகுல: டாக்டர் கிருஷ்ணா சிவகுலா சென்னை ஐஐடியில் கடந்த 1970ம் ஆண்டில் முதுகலை பட்டம் பெற்றார். (M.Tech.in Aeronautical Engineering) அத்துடன் கடந்த 1980 ஆம் ஆண்டில் ஹார்வர்ட் பல்கலைக்கழகத்தில் எம்பிஏ பட்டம் பெற்றார். பின்னர் நியூயார்க்கில் உள்ள ஹாஃப்மேன் குழும நிறுவனங்களில் குழுமத் தலைவர் மற்றும் தலைமை நிர்வாக அதிகாரியாகப் பணியாற்றினார்.
பின்னர், சிவகுல இரண்டு உலகின் நம்பர் ஒன் நிறுவனங்களை அடுத்தடுத்து நிறுவினார். அதி உயர் தூய்மைப் பொருட்களை சான்றிளிக்க அட்வான்ஸ்டு மாஸ் ஸ்பெக்ட்ரோஸ்கோபியில் (advanced mass spectroscopic techniques) நிபுணத்துவம் பெற்ற ஷிவா டெக்னாலஜிஸ் இன்க் (Shiva Technologies Inc) என்ற நிறுவனத்தை கடந்த 1990ஆம் ஆண்டில் நிறுவினார்.
இவர் 1997-ல் ‘மெட்டல் இன்ஜெக்சன் மோல்டிங்’ (எம்ஐஎம்) எனப்படும் அதிநவீன பொறியியல் உற்பத்தி தொழில்நுட்பத்தை இந்தியாவிற்கு கொண்டு வந்தார். அமெரிக்காவில் அப்போது வளர்ந்துவரும் தொழில்நுட்பமாக அது இருந்தது.
இரண்டாவது கம்பெனியாக அதிக அளவில் சிக்கலான வடிவவியலுடன் கூடிய சிறிய உலோகம் மற்றும் செராமிக் பாகங்களை தயாரிக்கும் எம்ஐஎம் பிரைவேட் லிமிடெட் ( INDO US MIM Tec Pvt. Ltd) என்ற நிறுவனத்தை பெங்களூருவில் நிறுவினார். இவரின் எம்ஐஎம் நிறுவனம் திறன் மற்றும் விற்பனையின் அடிப்படையில் ஏறத்தாழ ரூ.1000 கோடி வருவாயுடன் உலகிலேயே முதலிடத்தை வகிக்கிறது.
ஐஐடி மெட்ராஸ், கடந்த 2015ஆம் ஆண்டில் மதிப்புமிகு முன்னாள் மாணவர் விருது வழங்கியதன் மூலம் அவரின் தொழில்முறை சிறப்பையும், சமூகத்தற்கு ஆற்றும் பங்களிப்புகளையும் அங்கீகரித்தது.
இதையும் படிங்க: இனி ரயில்கள் ஓடாது பறக்கும்..! 30 நிமிடத்தில் சென்னை to பெங்களூரு.. ஐஐடியின் ஹைப்பர்லூப் ஆராய்ச்சி - Chennai Hyperloop
