சென்னை: கடன் வாங்குவதில் திமுக அரசு சாதனை படைத்துள்ளது என்று சட்டப்பேரவையில் இன்று எதிர்க்கட்சி தலைவர் எடப்பாடி பழனிசாமி அரசை விமர்சித்ததற்கு நிதி அமைச்சர் கொடுத்த பதிலும், அதனை தொடர்ந்து நடந்த விவாதமும் காரசாரமாக இருந்தது.
நிதியமைச்சர் தங்கம் தென்னரசு: கடன் கட்டுக்குள் இருக்கிறது. வாங்கிய கடனை திருப்பி செலுத்தக்கூடிய திறன் தமிழக அரசுக்கு உள்ளது.
எடப்பாடி பழனிசாமி: கடன் வாங்குவதில் திமுக அரசு சாதனை படைத்துள்ளது.
நிதியமைச்சர் தங்கம் தென்னரசு: கடன் வாங்கக் கூடிய அளவிற்கு திறன் உள்ளதால் தான் நமக்கு கடன் கொடுக்கிறார்கள். திருப்பி செலுத்தவில்லை என்றால் கடன் கொடுக்க மறுத்துவிடுவார்கள். 7 லட்சம் கோடி வரை கடன் கொடுத்து வருகிறோம். 4 லட்சம் கோடி கடன் பெற்று இருக்கிறோம்.
எடப்பாடி பழனிசாமி: மூலதன செலவு அதிகரிக்காமல் வருவாய் செலவு அதிகரித்து வருவதால் மீண்டும் அதை எப்படி சரி செய்ய முடியும்? யார் அந்த சார் என்ற பேட்ஜ் அணிந்து சட்டபேரவைக்கு வந்ததற்கு, மலிவான அரசியல் என முதலமைச்சர் விமர்சனம் செய்துள்ளார். 1989 ஆம் ஆண்டு சட்டப்பேரவையில் நாங்கள் எதிர்க்கட்சியில் இருந்த போது, அப்பொழுது அம்மாவிற்கு நடந்தது தான் மலிவான அரசியல். 2017 ஆம் ஆண்டு நம்பிக்கையில்லா தீர்மானம் கொண்டு வந்த பொழுது சட்டப்பேரவை நடந்த நிகழ்வு அனைத்து தொலைக்காட்சியிலும் ஒளிபரப்பு செய்யப்பட்டது. சட்டப்பேரவை தலைவரை திமுக உறுப்பினர்கள் கையை பிடித்து கீழே இழுத்து மலிவான அரசியலில் ஈடுபட்டனர். எங்கள் மேசையின் மீது ஏறி நடனமாடியது தான் மலிவான அரசியல்.
அண்ணா பல்கலைக்கழக மாணவி பாலியல் வழக்கில் உண்மை குற்றவாளிகளை கைது செய்ய வேண்டும் என்பது பிரதான கோரிக்கை. இதை வைத்து அரசியல் செய்யாமல் அவியலா செய்ய முடியும்? தினம் ஒரு அமைச்சர் இது குறித்து பேசி வருகிறார்.
முதல்வர் ஸ்டாலின்: நீங்கள் தினம் ஒரு அறிக்கையை விடுவதால் தான் எங்களுடைய அமைச்சர்கள் அதற்கான பதிலை சொல்லி வருகின்றனர். நீங்கள் தவறான செய்தியை மீண்டும் மீண்டும் சொல்வதால் தான் அமைச்சர்கள் அதற்கான பதிலை தெரிவித்து வருகின்றனர். எந்த காலத்திலும் நாங்கள் யாரையும் காப்பாற்ற முயற்சிக்கவில்லை. இது எங்களுக்கு தேவையில்லாத ஒன்று. குற்றவாளிக்கு உரிய தண்டனை வாங்கி கொடுப்பதுதான் எங்களுடைய கடமை. மீண்டும் மீண்டும் இதை பேசுவதால் பொள்ளாச்சியில் நடந்த சம்பவத்தை ஆரம்பிக்க வேண்டிய சூழல் வரும்.
சபாநாயகர்: உயர் நீதிமன்ற அறிவுரைகளின் படி மூன்று ஐபிஎஸ் அதிகாரிகளை கொண்ட சிறப்பு புலனாய்வு குழு அமைக்கப்பட்டுள்ளனர்.
முன்னவர் துரை முருகன்: சிறப்பு புலனாய்வு குழு விசாரித்து வருகிறது. என்ன புகாராக இருந்தாலும் நீங்கள் அங்கு தெரிவிக்கலாம்.
எடப்பாடி பழனிசாமி: போக்குவரத்து துறை அமைச்சர், அதிமுக பாலியல் குற்றவாளிகளின் சரணாலயம் என தெரிவித்துள்ளார்.
துரை முருகன்: அவையில் பேசும் கருத்துக்களுக்கு மட்டும் தான் பதிலளிக்க முடியும். வெளியில் பேசுவதற்கு பதில் அளிக்க முடியாது.
எடப்பாடி பழனிசாமி: 2019ஆம் வருடம் பொள்ளாச்சி பாலியல் சம்பவம் நடைபெற்றது. பொள்ளாச்சி விவகாரத்தைப் பற்றி முதலில் பாதிக்கப்பட்ட பெண் கொடுத்த புகாரின் அடிப்படையில் நடவடிக்கை எடுக்கப்பட்டுள்ளது.
முதல்வர்: பொள்ளாச்சி சம்பவத்தில் புகார் அளித்தவுடன் எஃப்ஐஆர் பதிவு செய்யவில்லை. ஆனால், அண்ணா பல்கலைக் கழகத்தில் புகார் கொடுத்த உடனே எஃப்ஐஆர் பதிவு செய்யப்பட்டு சம்பந்தப்பட்டவர் கைது செய்யப்பட்டுள்ளார். பொள்ளாச்சி வழக்கில் எஃப்ஐஆர் பதிவு செய்யப்பட்டு 12 நாட்கள் கழித்து தான் கைது நடவடிக்கை செய்யப்பட்டது. அந்த 12 நாட்களில் நடந்தது, யாரை காப்பாற்றுவதற்கான முயற்சியில் ஈடுபட்டனர்.
எடப்பாடி பழனிசாமி: முதலமைச்சர் தவறான தகவலை தெரிவித்ததால் அதற்கு பதில் சொல்லி வருகிறேன்.
முதல்வர்: பொள்ளாச்சி வழக்கு சிபிசிஐடி-க்கு மாற்றப்பட்டது பின்னர் தான் சிபிஐ -க்கு மாற்றப்பட்டு வழக்கில் எந்த கட்சியினர் அதில் தொடர்புடையவர்கள் என தெரிய வந்தது. அண்ணா பல்கலைக்கழக பாலியல் வழக்கில் தொடர்புடையவர் திமுகவை சார்ந்தவர் அல்ல; திமுக அனுதாபி. அண்ணா நகரில் சிறுமி பாலியல் குற்ற வழக்கில் தொடர்புடையவரை கட்சியிலிருந்து அதிமுக நீக்கி உள்ளது, அதை வரவேற்கிறோம். ஆனால், அண்ணா பல்கலைக் கழக பாலியல் குற்றவாளி திமுக கட்சியில் இல்லாதவரை நாங்கள் எப்படி நீக்க முடியும்.
எடப்பாடி பழனிசாமி: இந்த வழக்கை சிபிஐ விசாரணைக்கு உத்தரவிட கோரிவிட்டோம். நீங்கள் சிபிஐ விசாரணை வேண்டாம் என நினைப்பவர்கள். எந்த ஆட்சியில் தவறு இருந்தாலும் நடவடிக்கை எடுக்க வேண்டும். பொள்ளாச்சி சம்பவத்தில் உரிய நடவடிக்கை எடுத்தோம்.
முதல்வர்: நீங்கள் உரிய நடவடிக்கை புகார் அளித்தும் எடுக்கவில்லை. நீங்கள் கூறியதை நிருபித்துவிட்டால் நான் தண்டனை ஏற்கிறேன். நான் கூறியதை நிருபித்துவிட்டால் என்ன தண்டனை தந்தாலும் ஏற்பீர்களா? என இப்படியான கேள்விகளும் அதற்கான பதில்களும் என சட்டப்பேரவையில் இன்றைய விவாதம் பரபரப்பாக இருந்தது.
