சென்னை: கிண்டி மருத்துவமனை மருத்துவர் மீதான தாக்குதலை கண்டித்து நடைபெறவிருந்த காலவரையற்ற போராட்டத்தை திரும்பப் பெற்று, தர்ணா போராட்டத்தை மேற்கொள்ள உள்ளதாக அனைத்து மருத்துவர்கள் சங்கத்தின் கூட்டமைப்பினர் தெரிவித்துள்ளனர்.
கிண்டி மருத்துவமனையில் பணியில் இருந்த மருத்துவர் மீது நேற்று தாக்குதல் நடத்தப்பட்ட சம்பவம் தமிழ்நாடு முழுவதும் பெரும் அதிர்வலையை ஏற்படுத்தியது. தற்போது அதனைக் கண்டித்து மருத்துவர்கள் சங்கம் தரப்பில் போராட்டம் அறிவிக்கப்பட்டது. அதையடுத்து தலைமைச்செயலகத்தில் அமைச்சர் மா.சுப்பிரமணியன் தலைமையில் பேச்சுவார்த்தை நடத்தப்பட்டது.
அதன் பிறகு செய்தியாளர்களிடம் பேசிய அனைத்து மருத்துவர்கள் சங்கத்தின் கூட்டமைப்பின் ஒருங்கிணைப்பாளர்கள் பாலகிருஷ்ணன் மற்றும் அகிலன், "மருத்துவர் மீது நடைபெற்ற தாக்குதல் அதிர்ச்சியடையும் வகையில் உள்ளது. மருத்துவரைத் தாக்கிய நபர் மீது உரிய நடவடிக்கை எடுக்க வேண்டும் எனவும், இதில் தொடர்புள்ள மற்ற நபர்களையும் கைது செய்ய வேண்டும் எனவும் அமைச்சரிடம் கூறினோம்.
இதையும் படிங்க: "மருத்துவர்கள் வேலை நிறுத்தம் வாபஸ்" அமைச்சர் மா.சுப்பிரமணியன் தகவல்!
மேலும், ஆயுதம் தாங்கிய காவலர் பாதுகாப்பு தரவேண்டும் என்றும், மருத்துவர்களின் எண்ணிக்கை அதிகரிக்க வேண்டும் எனவும் கூறியுள்ளோம். தங்களுடைய கோரிக்கையை அமைச்சர் ஏற்றுக்கொண்டதன் அடிப்படையில் தங்களுடைய காலவரையற்ற வேலை நிறுத்தம் திரும்ப பெறப்பட்டுள்ளது. ஆனால் நவ.14ஆம் தேதி 8 மணி முதல் 10 மணி வரை தர்ணா போராட்டம் நடத்தப்படும்.
இதற்கிடையே, எந்தவித மருத்துவமனை சார்ந்த அலுவலக கூட்டத்திலும் மருத்துவர்கள் கலந்துகொள்ள மாட்டார்கள். அடுத்த 3 நாட்களுக்குள் தங்களுடைய கோரிக்கை நிறைவேறவில்லை என்றால்
ஞாயிற்றுக்கிழமை அவசர செயற்குழு கூட்டம் கூடி அடுத்தகட்ட நடவடிக்கை எடுக்கப்படும்" எனத் தெரிவித்தனர்.
ஈடிவி பாரத் வாட்ஸ்அப் சேனலில் இணைய இங்கே கிளிக் செய்யவும்
